पर्साको वीरगञ्ज नाकाबाट असोज २० गते १० लाख ६ हजार ७ सय ६० रुपैयाँ बराबरका मोबाइल, कस्मेटिक सामान र स्याउ बरामद भएपछि चाडपर्वको मुखमा मधेसको अर्थतन्त्र र राज्यको राजस्वमा गम्भीर धक्का पुगेको छ।
नेपाल प्रहरीले वीरगञ्ज महानगरपालिका–१४ गण्डक चोकबाट भारतबाट भन्सार छली ल्याइएका तीन थान आइफोन–१७ र एक थान आइफोन–१५ बरामद गरेको हो। बरामद मोबाइलको मूल्य पाँच लाख ५२ हजार २१० रुपैयाँ रहेको प्रहरीले जनाएको छ।
त्यस्तै, वीरगञ्ज महानगरपालिका–१६ रजतजयन्ती चोकबाट ४ लाख ५४ हजार ५५० रुपैयाँ बराबरका कस्मेटिक सामान र स्याउ नियन्त्रणमा लिइएको छ। यसअघि असोज १८ गते सशस्त्र प्रहरी बलले वीरगञ्जबाट १३ लाख रुपैयाँ बराबरको एक ट्याक्टरसहित विभिन्न भन्सार छलीका सामान बरामद गरेको थियो। सोही दिन २ लाख ५१ हजार ८२० रुपैयाँ बराबरको कपडा र १ लाख १२ हजार ८०० रुपैयाँ बराबरको स्मार्ट टिभी तथा टाँगा-घोडा पनि नियन्त्रणमा लिइएको थियो।
यसैबीच, असोज १९ गते चितवन प्रहरीले राजस्व तथा खरिद-बिक्रीको आधिकारिक बिलबिजक नभएका ५५ थान आइफोनसहित ६२ वटा उपकरणसहित दुई जनालाई पक्राउ गरी थप अनुसन्धान तथा कानुनी कारबाहीका लागि वीरगञ्ज भन्सार कार्यालय पठाएको थियो।
वीरगञ्जमा भन्सार छलीका घटना बढिरहेका बेला सशस्त्र प्रहरी बल, नेपाल नम्बर ७ गण हेडक्वार्टर सिराहाले पनि साउन र भदौ २०८३ मा सिराहाका विभिन्न सीमावर्ती क्षेत्रबाट करिब २ करोड ९५ लाख रुपैयाँ बराबरको अवैध सामान बरामद गरेको थियो। असोज ११ गतेसम्म ५३ लाख रुपैयाँ बराबरका लत्ताकपडा, किराना सामान, सुर्ती, खेलौना, कस्मेटिक सामग्री, हार्डवेयरका सामान, पेय पदार्थ, मदिरा, फोटो फ्रेम तथा औषधिलगायतका सामान भन्सार कार्यालयमा दाखिला गरिएको थियो।
भन्सार छलीले वीरगञ्जका वैध व्यापारीहरूलाई प्रत्यक्ष मारमा पारेको छ। भन्सार तिरेर सामान ल्याउने व्यवसायीहरू अवैध रूपमा भित्र्याइएका सस्तो सामानसँग प्रतिस्पर्धा गर्न बाध्य छन्, जसले उनीहरूको व्यवसाय प्रभावित भएको छ। यसबाट राज्यको राजस्वमा प्रत्यक्ष क्षति पुग्छ, जसको असर मधेस प्रदेशको विकास बजेटमा पर्ने निश्चित छ।
अवैध व्यापारले खुम्चिँदै मधेसको विकास
भन्सार छलीले राज्यको राजस्व संकलनमा प्रत्यक्ष असर पार्छ, जसले मधेसको विकासमा बाधा पुर्याउँछ। तराई-मधेसका जिल्लाहरू जोड्ने हुलाकी राजमार्ग, यस क्षेत्रको जीवन रेखा हो। यसको निर्माण र स्तरोन्नतिका लागि राजस्व संकलन महत्त्वपूर्ण हुन्छ। हुलाकी राजमार्गले तराई-मधेसका दुर्गम गाउँका नागरिकलाई राहत दिँदै आधारभूत सेवाको पहुँच पुर्याएको छ। अवैध व्यापारले यस्ता पूर्वाधार विकासका लागि आवश्यक स्रोत खुम्च्याउँछ।
वीरगञ्ज भन्सार नाकाबाट व्यापक रूपमा तस्करी हुने गरेको पाइएको छ, जसमा प्रहरी र भन्सार अधिकारीहरूको समेत संलग्नता रहेको आरोप लाग्ने गरेको छ। तस्करहरूले भारतको रक्सौलबाट विभिन्न प्रकारका लत्ताकपडा, इलेक्ट्रोनिक सामान, खाद्यान्न र कस्मेटिकलगायतका सामग्रीहरू विभिन्न माध्यमबाट नेपाल भित्र्याउने गर्छन्। चाडपर्व नजिकिँदै गर्दा तस्करीका घटनाहरू बढ्ने गरेको सशस्त्र प्रहरीले जनाएको छ।
बरामद गरिएका सबै सामानलाई आवश्यक कानुनी कारबाहीका लागि वीरगञ्ज भन्सार कार्यालयमा बुझाइनेछ। भन्सार छलीका घटनामा संलग्न व्यक्तिहरूमाथि भन्सार ऐन, २०६४ बमोजिम कारबाही हुनेछ। यसबाहेक, पर्सा प्रहरीले घुस लिएको आरोपमा एक इन्स्पेक्टरसहित तीन प्रहरीमाथि डीएसपी राजु कार्कीको नेतृत्वमा छानबिन समिति गठन गरी अनुसन्धान गरिरहेको छ, जसको प्रतिवेदन प्रहरी प्रधान कार्यालयमा पठाइनेछ। सीमा क्षेत्रमा हुने अवैध गतिविधि नियन्त्रण गर्न सशस्त्र प्रहरी बलको निगरानी निरन्तर जारी रहने सशस्त्र प्रहरी बलले जनाएको छ।
