ताजा अपडेट: बुढीगण्डकी बाढीले खतराको तह पार गर्यो: गोरखादेखि नवलपरासीसम्म उच्च सतर्कता
गोरखाको चुमनुब्री गाउँपालिकामा बुढीगण्डकी नदीमा आएको भीषण बाढीले पैयू र बगर गाउँका ३५ घर बगाएको छ। गृहमन्त्री सुदन गुरुङले प्रभावित क्षेत्रमा उद्धारका लागि हेलिकप्टर परिचालन भइसकेको जानकारी दिएका छन्।
बाढीले चुमनुब्री गाउँपालिका–३ का घट्टेखोला, पयुँ, सल्लेरी तथा जगत बगर क्षेत्रमा व्यापक क्षति पुर्याएको छ। बाढीले जगत बगरको स्वरूप नै परिवर्तन गर्यो भने घट्टेखोलामा रहेको विकास प्राथमिक विद्यालयको भवनसमेत बगाएको छ। हालसम्म मानवीय क्षति भने भएको छैन।
गोरखाका प्रमुख जिल्ला अधिकारी धर्मेन्द्रकुमार मिश्रका अनुसार आइतबार बिहान ४ बजेर ३५ मिनेटमा ठूलो बाढी आएको सूचना प्राप्त भएको थियो। राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी अधिकृत धर्मराज उप्रेतीले बाढीले आरुघाटसम्म क्षति पुर्याउन सक्ने जोखिम रहेको बताएका छन्।
बाढी पूर्वानुमान महाशाखाले आइतबार बिहान ६ बजेर ४० मिनेटतिर सूचना जारी गर्दै चुमनुब्री गाउँपालिका–६ बाट बुढीगण्डकी नदीमा ठूलो बाढी आइरहेको जनाएको छ। महाशाखाले नदीको छेउछाउ नजान र सुरक्षित उच्च स्थानमा बस्न आग्रह गर्दै बाढीको बहाव त्रिशूली दोभानसम्म पुग्न सक्ने चेतावनी दिएको छ।
धार्चे गाउँपालिका क्षेत्रमा पनि बाढीले क्षति पुर्याएको छ। धार्चे गाउँपालिकाकी उपाध्यक्ष सुनिला गुरुङका अनुसार बाढीले दोभानको बेलिब्रिज, केरौंजा जाने पुल तथा केही घर बगाएको छ। प्रमुख जिल्ला अधिकारी मिश्रले सोती बजारमा रहेको पुल तथा केही टहरा पनि बगाएको जानकारी दिए।
गृहमन्त्री गुरुङले नेपाल प्रहरी, सशस्त्र प्रहरी बल र स्थानीय प्रशासनलाई उद्धार, राहत तथा प्रभावित नागरिकलाई सुरक्षित स्थानमा स्थानान्तरण गर्न परिचालन गरिएको बताए। जिल्ला प्रहरी कार्यालय गोरखाका प्रहरी निरीक्षक आकाश कँडेलले बाढीको जोखिम कायमै रहेकाले तल्लो तटीय क्षेत्रमा पर्ने सिर्दिबासका साथै धार्चे गाउँपालिकाका खोर्लाबेँसी, माछाखोला, सोती, आर्खेत र आरुघाटका बासिन्दालाई तत्काल सुरक्षित स्थानमा जान आग्रह गरिएको जानकारी दिए।
चुमनुब्री गाउँपालिकाका अध्यक्ष निमा लामाले चुम्के खोलामा पहिरो खसेर थुनिएको र त्यसपछि बाढी आएको बताएका थिए। बाढी आउनुको यकिन कारण अझै पुष्टि भइसकेको छैन।
यसअघि: बुढीगण्डकीको बाढीले गोरखाको चुमनुब्रीमा ३५ घर बगायो, स्थानीय सुरक्षित स्थानमा सरे
