गोरखाको चुमनुब्री गाउँपालिका–६ स्थित जगतमा बूढीगण्डकी बाढीले सातवटा घर बगाएको छ। चुमनुब्री गाउँपालिकाकी उपाध्यक्ष लक्ष्मी गुरुङका अनुसार, पैयू र बगर गाउँका ३५ घर डुबानमा परेका छन्।
आइतबार बिहान उग्युलुङ खोला थुनिएर बूढीगण्डकी नदीमा आकस्मिक बाढी आएको जिल्ला प्रहरी कार्यालय गोरखाका प्रहरी निरीक्षक आकाश कँडेलले बताए। बाढीले चुमनुब्री गाउँपालिकास्थित सल्लेरी बजार बगाएको छ भने जगत बजारमा समेत व्यापक क्षति पुगेको प्रारम्भिक विवरण प्राप्त भएको छ। यसअघि ३५ घर बगाएको खबर आएको थियो।
स्थानीय बासिन्दा सुरक्षित स्थानमा पुगिसकेकाले मानवीय क्षति भने नभएको प्रहरीले जनाएको छ। राष्ट्रिय विपत् जोखिम न्यूनीकरण तथा व्यवस्थापन प्राधिकरणले नदी आसपासका बासिन्दालाई सतर्क रहन आग्रह गरेको छ।
बाढी पूर्वानुमान महाशाखाले आइतबार बिहान ६:४० बजे बूढीगण्डकी नदीमा ठूलो बाढी आइरहेको एसएमएस सूचना जारी गरेको थियो। मौसम विभागले बाढी तल्लो तटीय क्षेत्र आरुघाटसम्म पुग्न करिब तीन घण्टा लाग्ने अनुमान गरेको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले माथिल्लो क्षेत्रमा पानी परेको रेकर्ड नभएकाले पहिरो गएर बहाव रोकिएको र पछि बाँध फुटेर आकस्मिक बाढी आएको हुनसक्ने प्रारम्भिक अनुमान गरेको छ। बाढीको वास्तविक कारण भने अझै खुल्न सकेको छैन।
चुमनुब्री गाउँपालिकाका प्रमुख प्रशासकीय अधिकृत नारायण सापकोटाले नदीको बहाव बढेकाले तटीय क्षेत्रका बासिन्दालाई तत्काल सुरक्षित तथा उच्च स्थानमा जान आग्रह गरेका छन्। बाढीको जोखिमलाई ध्यानमा राखेर सिर्दिबास तथा धार्चे गाउँपालिकाका खोर्लाबेँसी, माछाखोला, सोती, आर्खेत र आरुघाटका बासिन्दालाई सुरक्षित स्थानमा जान अनुरोध गरिएको छ।
यसअघि: बूढीगण्डकी बाढीले गोरखाको सल्लेरी बजार बगायो, जगतमा ठूलो क्षति
