राष्ट्रिय स्वतन्त्र पार्टी (रास्वपा) का सभापति रवि लामिछाने यस वर्ष छठ पर्व मनाउन जनकपुरधाममा सर्वसाधारणको घरमा बस्ने भएका छन्। राजनीतिक आग्रह र प्रभावबाट मुक्त रहन उनले पार्टीसँग असम्बन्धित नागरिकको घर रोज्न आग्रह गरेको रास्वपा सांसद मनिष झाले जानकारी दिएका छन्।
सभापति लामिछाने आफ्नी श्रीमती निकिता पौडेल लामिछाने र परिवारका सदस्यसहित जनकपुर आउने तयारीमा छन्। निकिता पौडेल लामिछानेले खरनादेखि बिहानको अर्घसम्मका सम्पूर्ण विधिमा व्रत बसेर छठमा सहभागी हुने झाको भनाइ छ।
राजनीतिक कार्यक्रम नराखी सर्वसाधारणसँग भेटघाट
लामिछानेले जनकपुरधामस्थित गंगासागरमा छठ मनाउनेछन्। उनको भ्रमणका क्रममा राजनीतिक कार्यक्रमलाई प्राथमिकता दिइने छैन। उनले सकेसम्म धेरै छठ घाटमा पुगेर सर्वसाधारणसँग भेटघाट गर्ने योजना बनाएका छन्।
सांसद झाका अनुसार विगतमा जनकपुरमा विवाहपञ्चमी लगायतका कार्यक्रममा प्रधानमन्त्री बालेन शाहको भ्रमणका क्रममा राजनीतिक सवारीले व्यापार व्यवसाय प्रभावित भएको, सर्वसाधारणलाई असहज भएको तथा सुरक्षा चुनौती देखिएको अनुभव छ। यसपटक त्यस्ता समस्या दोहोरिन नदिने गरी तयारी गरिएको उनले बताए।
भीडभाड व्यवस्थापनमा ध्यान
छठ पर्वका लागि जनकपुरमा तयारी तीव्र बनाइएको छ। भीडभाड व्यवस्थापनलाई ध्यानमा राखेर छठ पूजाको व्यवस्थापन मिलाइएको सांसद झाले जनाए। प्रधानमन्त्री बालेन शाहको जनकपुर भ्रमणबारे भने कुनै औपचारिक जानकारी नआएको उनले बताए।
