संखुवासभामा एक लाख ८५ हजारभन्दा बढी नागरिकले राष्ट्रिय परिचयपत्रका लागि विवरण दर्ता गराए पनि २०७७ असोजदेखि कार्ड वितरण ठप्प छ।
जिल्ला प्रशासन कार्यालय खाँदबारी र इलाका प्रशासन कार्यालय चैनपुरबाट २०७६ साउन ३ गतेदेखि विवरण दर्ता सुरु गरिएको थियो। दर्ता भएकामध्ये ९१ हजार तीन पुरुष र ९४ हजार ४२ महिला रहेका छन्।
राष्ट्रिय परिचयपत्र वितरण शाखा खाँदबारीका प्रमुख आशा जबेगुका अनुसार, हालसम्म २५ हजार कार्ड छपाइ भएका छन्। १० हजार ७६१ जनाले कार्डसमेत प्राप्त गरिसकेका छन्।
सरकारले राष्ट्रिय परिचयपत्र वितरणको दोस्रो चरणमा कोशी प्रदेशका संखुवासभा र झापाबाट दर्ता सङ्कलन सुरु गरेको थियो। जिल्लाका १० वटा स्थानीय तहमा घुम्ती शिविरमार्फत समेत विवरण सङ्कलन गरियो।
नयाँ नागरिकता र राहदानी बनाउन राष्ट्रिय परिचयपत्र अनिवार्य गरिएकाले दर्ता सङ्ख्या बढेको शाखा प्रमुख जबेगुले बताइन्।
परिचयपत्र बनाउन नागरिकता, विवाह दर्ता र बसाइँसराइ कागजातको सक्कल प्रति अनिवार्य छ।
विवरण दर्ता भए पनि कार्ड छपाइ प्रक्रिया सुस्त हुँदा जिल्लामा २०७७ असोजदेखि राष्ट्रिय परिचयपत्र कार्ड आउन सकेको छैन।
