सप्तरी प्रहरीले अभद्र व्यवहार, आत्महत्या दुरुत्साहन र लागुऔषध मुद्दामा तीन जनालाई पक्राउ गरेको छ। राजविराज नगरपालिका ६ निवासी फिरोजलाई अभद्र व्यवहारमा पक्राउ गरिएको हो।
फिरोजले २०८३ वैशाख ९ गते राजविराज ७ मा चप्पल–बक्सामाथि मोटरसाइकल चढाएको विषयमा विवाद हुँदा गालीगलौज र कुटपिट गरेको आरोप छ। प्रहरीले उनलाई राजविराज ६ को राम मन्दिर अगाडिबाट पक्राउ गरेको हो। जिल्ला प्रशासन कार्यालय सप्तरीबाट ६ दिनको म्याद थप गरी अनुसन्धान भइरहेको छ।
यस्तै, आत्महत्या दुरुत्साहन मुद्दामा गणेशमान चारनाथ नगरपालिका ८ निवासी अमितकुमार यादव पक्राउ परेका छन्। जिल्ला प्रहरी कार्यालय सप्तरीका सूचना अधिकारी डम्बरबहादुर पुरीका अनुसार, २०८२ चैत १४ गते तिलाठी कोइलाडी गाउँपालिका ४ निवासी मनिषाकुमारी मण्डलले विषादी सेवन गरेपछि मृत्यु भएको थियो।
यादवले टिकटक लाइभमा अश्लील गालीगलौज गरेको भिडियो सार्वजनिक गरेका कारण मण्डलले मानसिक तनावमा विषादी सेवन गरेको भन्दै चन्दनकुमार मण्डल धानुकले जाहेरी दिएका थिए। सोही आधारमा मुद्दा दर्ता गरी यादवलाई गणेशमान चारनाथबाट पक्राउ गरिएको हो। सप्तरी जिल्ला अदालतबाट चार दिनको म्याद थप गरी अनुसन्धान भइरहेको छ।
लागुऔषध मुद्दामा कञ्चनरुप नगरपालिका ९ निवासी मनिरेखा कुमारी यादवलाई पक्राउ गरिएको छ। उनको साथबाट ३.३२ ग्राम ब्राउन सुगर र १६२.२ ग्राम गाँजा बरामद भएको छ। उनलाई सप्तरी जिल्ला अदालतबाट ६ दिन म्याद थप गरी अनुसन्धान भइरहेको छ।
