पूर्व–पश्चिम राजमार्गको अमलेखगञ्ज सडकखण्डमा अतिक्रमणमा परेको ३५ घरधुरी र एक सामुदायिक विद्यालयको संरचना भत्काइएको छ। डिभिजन वन कार्यालय बाराको नेतृत्वमा सडक, वन र निकुञ्जको जग्गा खाली गर्ने कार्य शुक्रबार बिहान ७ बजेदेखि सुरु भएको हो।
राजमार्गको ३ नम्बर पुल क्षेत्रमा रहेका संरचनाहरू भत्काउन नेपाल प्रहरी, सशस्त्र प्रहरी बल, वन रक्षक तथा पर्सा राष्ट्रिय निकुञ्जका कर्मचारी परिचालन गरिएको छ। सहायक वन अधिकृत वीरेन्द्र यादवका अनुसार स्थानीय र प्रशासनबीच सामान्य झडप भए पनि अहिले अवस्था सामान्य छ।
अतिक्रमण गरी होटल व्यवसाय सञ्चालन गर्ने अधिकांश मकवानपुरका बासिन्दा रहेको पाइएको छ। डिभिजन सडक कार्यालयले २५/२५ मिटर सडक क्षेत्र खाली गराएपछि वन र निकुञ्जले पनि आफ्नो स्वामित्वको जग्गा खाली गराउने प्रक्रिया अघि बढाएको हो।
