ललितपुरको चाँगाथलीमा नक्कली ब्राण्डेड मदिरा बनाउने अखडामा सशस्त्र प्रहरीले छापा मारेको छ। सो स्थानबाट चार जनालाई ठूलो मात्रामा अवैध मदिरासहित नियन्त्रणमा लिइयो। सशस्त्र प्रहरी बल नेपाल इन्टेलिजेन्स ब्युरोको सूचनामा विर्खबहादुर तामाङको घरमा छापा मारियो।
रेड लेबल, ब्ल्याक लेबलसहित महँगा ब्राण्डेड रक्सीका लेबल लगाइएका मदिरा बरामद भए। सशस्त्र प्रहरीका सहप्रवक्ता शैलेन्द्र थापाले यकिन परिमाण खुल्न नसकेको बताए।
पक्राउ पर्नेमा रामेछाप खाँडादेवी गाउँपालिका-२ का ३० वर्षीय मनोज खत्री छन्। सोही जिल्लाको खिम्ति गाउँपालिकाका २८ वर्षीय विनोद तामाङ र २६ वर्षीय विवेक तामाङ पनि पक्राउ परे। सिन्धुपाल्चोकको बाह्रविसे नगरपालिका–६ का २२ वर्षीय छिदेन निमा तामाङ पनि नियन्त्रणमा छन्।
प्रहरीले रक्सी बनाउन प्रयोग हुने केमिकल, उपकरण, राजश्वको स्टिकर र होलोग्रामसमेत बरामद गर्यो।
नियन्त्रणमा लिइएका व्यक्ति र बरामद सामानसहित सम्बन्धित निकायमा बुझाउने प्रक्रियामा रहेको डीएसपी थापाले बताए।
