पूर्वाधार विकास मन्त्रालयले अध्ययन बिदा र असाधारण बिदाको अवधि सकिएपछि पनि कार्यालयमा हाजिर नभएका सात इन्जिनियरलाई कारबाही गर्ने तयारी गरेको छ। मन्त्रालयले आज सूचना जारी गर्दै उनीहरूलाई कारबाही प्रक्रिया अघि बढाएको जनाएको छ।
मन्त्रालयले इन्जिनियरहरूसँग स्पष्टीकरण माग गरेको छ। निजामती सेवा ऐन-२०४९ को दफा ५९ को खण्ड (ख) को उपदफा (१) बमोजिम कारबाही गर्नुपर्ने कुनै मनासिव कारण भए सूचना प्रकाशित भएको मितिले १५ दिनभित्र सफाइ पेस गर्न भनिएको छ।
स्पष्टीकरण पेस नगरेमा निजामती सेवा ऐनबमोजिम कारबाही हुने व्यहोरा सूचनामा उल्लेख छ। मन्त्रालयले इन्जिनियर पुजन न्यौपाने, सृष्टि भुसाल, सम्योग श्रेष्ठ, आस्था आचार्य, नरेश थापा, रमेश प्रसाद पौडेल र पदमेन्द्र प्रसाद श्रेष्ठसँग स्पष्टीकरण माग गरेको हो।
