२६ वर्षदेखि बन्द हेटौँडा कपडा उद्योग पुनः सञ्चालनका लागि आगामी बजेटमा रकम विनियोजन गर्ने प्रतिबद्धता उद्योगमन्त्री गौरीकुमारी यादवले गरेकी छन्। शनिबार हेटौँडा औद्योगिक क्षेत्रको स्थलगत निरीक्षण गर्दै मन्त्री यादवले उद्योग सञ्चालनलाई प्राथमिकता दिइने बताइन्। यसबाट मुलुकको आर्थिक विकासमा टेवा पुग्ने र रोजगारी सिर्जना हुने उनको दाबी छ।
मन्त्री यादवले आगामी आर्थिक वर्षको बजेटमा रुग्ण कपडा उद्योग सञ्चालनका लागि बजेट विनियोजन गरिने प्रतिबद्धता व्यक्त गरिन्। उनले उद्योगका भौतिक संरचना, मेसिन उपकरण र पूर्वाधारको अवस्थाबारे जानकारी लिइन्। जीर्ण संरचनाको मर्मत, व्यवस्थापन र लगानी मोडालिटीबारे अध्ययन भइरहेको उनले बताइन्।
सरकारले बन्द तथा रुग्ण उद्योग पुनः सञ्चालन गर्ने नीति अघि बढाइरहेको सन्दर्भमा हेटौँडा कपडा उद्योगलाई पनि प्राथमिकता दिइएको हो। विसं २०३२ मा कम्पनी दर्ता भएको यो उद्योगले २०३५ मा परीक्षण उत्पादन सुरु गरेको थियो। १८ माघ २०५७ मा यो उद्योग बन्द भयो। कुनै समय देशकै प्रमुख सरकारी उद्योगमध्ये एक रहेको यस उद्योगले नेपाली सेनाका लागि समेत कपडा उत्पादन गर्थ्यो।
उद्योग सञ्चालनका लागि मन्त्रालयले प्राविधिक र आर्थिक पक्षबारे थप गृहकार्य गरिरहेको मन्त्री यादवले जानकारी दिइन्।
