गृहमन्त्री सुदन गुरुङ र नेपालस्थित अमेरिकी दूतावासकी कार्यवाहक राजदूत मेगन बोल्डिनबीच विपद् प्रतिकार्य तथा बाढी प्रभावितको पहिचानका विषयमा छलफल भएको छ। यो भेटवार्ता बिहीबार भएको अमेरिकी दूतावासले जनाएको छ।
भेटमा गत अगस्टमा आएको विनाशकारी बाढीमा ज्यान गुमाएका अमेरिकी र नेपाली नागरिकको पहिचान गर्ने जारी प्रयासबारे कुराकानी भएको थियो। साथै, नेपालमा विपद् व्यवस्थापनका लागि अमेरिका–नेपाल सहकार्यलाई थप प्रभावकारी बनाउने विषयमा पनि छलफल भएको छ।
अमेरिकाले नेपालमा बाढीपछिको राहत तथा पुनःस्थापनाका लागि ३ करोड ६० लाख अमेरिकी डलरभन्दा बढी सहयोग परिचालन गरिरहेको छ। यस सहयोगसँगै अमेरिकी उपकरण, प्रविधि र प्राविधिक विशेषज्ञतामार्फत नेपालका पहिलो उद्धारकर्तालाई सहयोग पुर्याइरहेको दूतावासको भनाइ छ।
छलफलका क्रममा विपद्का बेला उद्धार तथा प्रतिकार्य क्षमतालाई अझ प्रभावकारी बनाउने र प्रभावित समुदायलाई पुनःस्थापनामा सहयोग गर्ने विषयमा समेत जोड दिइएको छ। अमेरिकी दूतावासले नेपालसँगको सहकार्यले बाढीबाट प्रभावित समुदायलाई पुनःस्थापित हुन सहयोग पुगिरहेको जनाएको छ।
अगस्टमा आएको बाढीबाट ज्यान गुमाउने अमेरिकी र नेपाली नागरिकको यकिन संख्या भने अझै खुलेको छैन।
यसअघि: नेपाल र अमेरिका एमसीसी कम्प्याक्टको म्याद एक वर्ष बढाउन सहमतिको नजिक
