सप्तरीका अजयकुमार यादवसँग ३ लाख रुपैयाँ असुल्न खोज्ने ग्रान्ड स्विट जब म्यानपावरका एजेन्ट काठमाडौँको तीनकुनेमा रंगेहात पक्राउ परेका छन्। श्रम मन्त्रालयको सचिवालयको पहलमा गरिएको स्टिङ अपरेसनमा उनी समातिएका हुन्।
सरकारको ‘फ्रि भिसा फ्रि टिकट’ नीतिले १० हजार रुपैयाँ मात्र शुल्क तोकेको छ। तर, म्यानपावरले यादवसँग ३ लाख १० हजार रुपैयाँ माग्यो। उनले यसअघि नै ७० हजार रुपैयाँ बुझाइसकेका थिए।
म्यानपावरले बाँकी २ लाख २० हजार रुपैयाँ नदिएसम्म राहदानी, श्रम स्वीकृति र हवाई टिकट रोकेको थियो। यसपछि यादवले युवा, श्रम तथा रोजगार मन्त्री रामजी यादवको सचिवालयमा समस्या सुनाए।
अजय मन्त्री यादवकै निर्वाचन क्षेत्रका मतदाता हुन्। उनको समस्या समाधान गर्न मन्त्रीका स्वकीय उपसचिव सरोज यादव आफैँ खटिए। उनले सञ्चारकर्मी र प्रहरी अधिकारीहरूसँग समन्वय गरी तीनकुने प्रहरी वृत्तमा अपरेसन योजना बनाए।
म्यानपावरका कर्मचारीले शनिबार बिहान अजयलाई फोन गरे। उनले राहदानी र कागजात आफूसँग भएको बताए। पैसा लिएर तीनकुने गैरीगाउँस्थित पेट्रोलपम्प अगाडि भेट्न बोलाए।
प्रहरी टोलीले अजय र म्यानपावरका कर्मचारी भेटेको स्थानमा पुग्यो। एजेन्टलाई नियन्त्रणमा लियो। सुरुमा पैसा माग्न खोज्दा अजयले कागजात दिएपछि मात्र पैसा दिने बताए। यसपछि केहीबेर भनाभन भयो।
एजेन्टले ‘फ्रि भिसा फ्रि टिकट’ नीति विपरीत ३ लाख रुपैयाँ मागेको स्वीकारे। प्रहरीले उनलाई काठमाडौँ उपत्यका अपराध अनुसन्धान कार्यालय पुर्यायो।
प्रहरीले एजेन्टको साथबाट ४ वटा राहदानी, फ्लाइट टिकट र अन्य महत्त्वपूर्ण कागजात बरामद गर्यो। उनले ती सबै व्यक्तिहरूसँग पनि रकम असुल्ने मनसाय राखेको देखियो।
मन्त्री यादवका स्वकीय सचिव सरोज यादवले प्रहरी अधिकारीहरूलाई धन्यवाद दिए। उनले ‘तीनकुनेस्थित गैरीगाउँमा आज एक सोझो नेपाली ठगिनबाट रोकिएको’ बताए।
पीडित अजय यादवले खुसी व्यक्त गर्दै भने, “सुरुमा म्यानपावरले पैसा लाग्दैन, अन्तर्वार्ता पास भएपछि सबै मिलाउँला भन्यो। तर जब भिसा आयो, तब ३ लाख नदिए जान पाउँदैनौ भन्दै धम्क्याउन थाल्यो।”
उनले गरिब मान्छेले ऋण काढेर पैसा ल्याउनुपर्ने र यस्तो लुटधन्दा गर्नेलाई कडा कारबाही हुनुपर्ने माग समेत गरे।
प्रहरीले यादवको राहदानी, श्रम स्वीकृति, बिमा र हवाई टिकट बरामद गरी हस्तान्तरण गर्यो। यसपछि उनी आइतबार मलेसिया उड्न पाउने सुनिश्चित भयो।
पक्राउ परेका एजेन्टमाथि थप कानुनी कारबाहीका लागि अनुसन्धान अगाडि बढेको छ। श्रम मन्त्रालयको सचिवालयले वैदेशिक रोजगारीमा समस्या परे सिधै मन्त्रालयमा सम्पर्क गर्न अपिल गरेको छ।
