सूचना तथा सञ्चार मन्त्रालयले नेपाल टेलिभिजनका उपकरण र सेवा खरिद प्रक्रियामाथि छानबिन गर्न चार सदस्यीय समिति गठन गरेको छ। २०८३ असार १ गतेको मन्त्रीस्तरीय निर्णयबाट डा. सुदीप भट्टराईको संयोजकत्वमा समिति बनेको हो।
समितिलाई नेपाल टेलिभिजनले खरिद गरेका ग्राफिक्स सिस्टम, न्यु मिडिया सेवा, अडियो/भिडियो उपकरण, डिजिटल ट्रान्समिटर र इटहरी च्यानलका लागि ‘प्लेआउट अटोमेसन सिस्टम’बारे विस्तृत अध्ययन गर्ने कार्यादेश छ। यी खरिद प्रक्रियामा विभिन्न निकायमा उजुरी परेका छन्।
उजुरी र सार्वजनिक सरोकारका विषयमा तथ्यपरक अध्ययन गरी समितिले २१ दिनभित्र मन्त्रालयमा प्रतिवेदन पेस गर्नेछ। विगत केही वर्षयता प्रविधि र प्रसारण प्रणाली आधुनिकीकरणका खरिद प्रक्रियामा पारदर्शिता र कानुनी पालनाबारे प्रश्न उठ्दै आएका छन्। यसअघि मन्त्रालयले स्याटेलाइट खरिद प्रकरणमा पनि छानबिन समिति गठन गरेको थियो।
