नेपाली कांग्रेसको १५औँ महाधिवेशनमा सभापति र उपसभापतिका उम्मेदवारले मनोनयन फिर्ता लिएका छन्।
आज असोज २१ गते काठमाडौंमा जारी महाधिवेशनमा नेपाली कांग्रेसका नेता किशोरसिंह राठौरले सभापति पदबाट तथा नेता मिनेन्द्र रिजाल र प्रवक्ता देवराज चालिसेले उपसभापति पदबाट उम्मेदवारी फिर्ता लिएका हुन्। नेपाली कांग्रेसका सभापति गगन थापाको आग्रहमा उनीहरूले मनोनयन फिर्ता लिएको बताइएको छ।
नेता राठौरले पार्टीको बृहत्तर एकताका लागि उम्मेदवारी फिर्ता लिएको बताएका छन्। पूर्वमन्त्री रिजालले पनि थापाकै आग्रहमा आफूले उम्मेदवारी फिर्ता लिएको सार्वजनिक अभिव्यक्ति दिएका छन्। प्रवक्ता चालिसेले केहीबेरअघि मात्रै उम्मेदवारी फिर्ताको घोषणा गरेका हुन्।
‘विशेष परिस्थितिमा महाधिवेशन हुन लागेको, पार्टी संकटमा रहेको अवस्थामा सभापतिले सहयोग गर्नुपर्यो भनेका कारण पार्टीको बृहत्तर एकताका लागि उम्मेदवारी फिर्ता गरेको छु,’ राठौरले पत्रकारहरूसँग भनेका छन्।
राठौर र थापाबीच राजनीतिक लेनदेनको सहमति भएको बताइए पनि त्यसको विस्तृत विवरण खुलेको छैन। गगन थापाको आग्रहमा अन्य केही चर्चित नेताहरूले पनि उम्मेदवारी फिर्ता लिने तयारीमा रहेको Nmkhabarलाई स्रोतले पुष्टि गर्यो, तर नाम खुलाइएको छैन। केन्द्रीय कार्यसमितिका विभिन्न पदका लागि निर्वाचन आजै हुने कार्यक्रम छ।
