त्रिभुवन विश्वविद्यालय (त्रिवि) बाट अध्ययन बिदा लिएर तोकिएको समयमा नफर्किने ४४ प्राध्यापकले ११ करोड रुपैयाँ फिर्ता गरेका छन्। यो रकम त्रिविले उनीहरूलाई अध्ययनका लागि दिएको तलब र अन्य सुविधावापतको हो।
डा. जीवन काफ्लेको संयोजकत्वमा गठित समितिले त्रिविका ३९८ जना प्राध्यापकले अध्ययन बिदाको दुरुपयोग गरेको निष्कर्षसहितको प्रतिवेदन बुझाएको थियो। सोही प्रतिवेदनका आधारमा त्रिविले बिदाको दुरुपयोग गर्ने प्राध्यापकहरूलाई रकम फिर्ता गर्न सूचना जारी गरेको थियो।
त्रिविले विज्ञ शिक्षक उत्पादन गर्ने उद्देश्यले तलबसहितको अध्ययन बिदा दिने गरेको छ। तर, केही प्राध्यापकले तलब पनि लिने र तोकिएको समयमा नफर्किने प्रवृत्ति बढेपछि त्रिवि यस विषयमा कडाइका साथ प्रस्तुत भएको हो।
रकम फिर्ता नगर्ने प्राध्यापकहरूलाई त्रिविले पुनः एकपटक सार्वजनिक सूचना जारी गरी सम्पर्कमा आउन आग्रह गर्ने र त्यसपछि पनि अटेर गरेमा कडा कारबाही गर्ने तयारी गरेको छ।
