आगामी आर्थिक वर्ष २०८३/८४ को बजेट भाषण हुने दिन शुक्रबार अपराह्नदेखि ट्राफिक जरिवाना तिर्न प्रयोग गरिने अनलाइन प्रणाली अवरुद्ध हुनेछ। महालेखा नियन्त्रक कार्यालयले राजस्व व्यवस्थापन सूचना प्रणाली (RMIS) मा प्राविधिक मर्मत सम्भार गर्नुपर्ने भएकाले यो सेवा बन्द गर्न लागेको हो।
नेपाल प्रहरीका अनुसार, शुक्रबार जेठ १५ गते दिउँसो ३:३० बजेदेखि सेवा अवरुद्ध हुनेछ। मर्मतसम्भारका लागि न्यूनतम ४ घण्टादेखि अधिकतम १४ घण्टासम्म लाग्न सक्ने सूचनामा उल्लेख छ। यस अवधिभर ‘अनलाइन ट्राफिक नियम उल्लंघन जरिवाना भुक्तानी प्रणाली’ प्रयोगमा बाधा पुग्नेछ।
यो प्राविधिक समस्याले सरकारी राजस्व दाखिला र विभिन्न भुक्तानीसँग सम्बन्धित अन्य अनलाइन प्रणालीहरू जस्तै आइपीएफएमएस, सुत्र, एफएमआइएस लगायतका प्रणालीहरू पनि प्रभावित हुने महालेखा नियन्त्रक कार्यालयले जनाएको छ। डाटा सेन्टरको पावर ब्याकअप प्रणाली स्थानान्तरण गर्न लागिएकाले यस्तो समस्या आउन लागेको हो।
