प्रहरीले मुलुकका विभिन्न स्थानबाट लागूऔषधसहित ३५ जनालाई पक्राउ गरेको छ। लागुऔषध नियन्त्रण अभियान अन्तर्गत प्रहरीले काठमाडौं, भक्तपुर, झापा, बर्दिया, सुनसरी, कञ्चनपुर, नुवाकोट र सिराहाबाट अवैध लागूऔषधसहित ३५ जना व्यक्तिलाई पक्राउ गरेको हो।
काठमाडौंको टोखा नगरपालिका-९ गोङ्गबुबाट ब्राउनसुगर जस्तो देखिने पदार्थसहित दुई जना, झापाको गौरीगञ्ज गाउँपालिका-२ बाट दुई, मेचीनगर नगरपालिका-६ पुरानो मेचीपुलबाट एक र बिर्तामोड नगरपालिका-४ कन्चनजङघा टोलबाट दुई जनालाई प्रहरीले नियन्त्रणमा लिएको छ।
भक्तपुरको सूर्यविनायक नगरपालिका-५ कटुन्जे चोकबाट एक जना, मध्यपुरथिमि नगरपालिका-९ बोडेबाट एक जना, र मध्यपुरथिमि-५ राधेराधेमा डेरा गरी बस्ने जुम्लाका एक जना व्यक्ति पनि पक्राउ परेका छन्।
त्यस्तै, बर्दियाको राजापुर नगरपालिका-१० कोठियाघाट पुलबाट एक जना, सुनसरीको बराहक्षेत्र नगरपालिका-६ ठाकुरबारीबाट छ जना, इनरूवा नगरपालिका-४ बसचोकबाट तीन जना, बराहक्षेत्र नगरपालिका-७ सोमबारेबाट दुई जना, धरान उपमहानगरपालिका-१३ आदर्श नगरबाट एक जना, इटहरी उपमहानगरपालिका-१७ पकलीबाट पाँच जना र इटहरी उपमहानगरपालिका-१७ बाटै एक जनालाई प्रहरीले पक्राउ गरेको छ।
यसैगरी, कञ्चनपुरको पुनर्वास नगरपालिका-११ अमरबस्ती मसानघाटबाट तीन जना, नुवाकोटको विदुर नगरपालिका-९ बाघटारबाट दुई जना र सिराहाको गोलबजार नगरपालिका-६ गुम्बाटोलबाट एक जनालाई प्रहरीले पक्राउ गरेको छ। प्रहरीले यी सबै स्थानमा विशेष अभियान चलाएर लागुऔषध कारोबारमा संलग्न व्यक्तिहरूलाई पक्राउ गरेको जनाएको छ।
