स्वास्थ्य बिमा सुधार: मन्त्री मेहताद्वारा अस्पताल प्रमुखसँग छलफल
स्वास्थ्य तथा खाद्य स्वच्छता मन्त्री निशा मेहताले स्वास्थ्य बिमा कार्यक्रमका समस्या समाधान गर्न अस्पताल प्रमुखहरूसँग छलफल गरेकी छन्। मन्त्रालयमा आयोजित छलफलमा स्वास्थ्य बिमा बोर्ड र उपत्यकाका सरकारी अस्पतालका प्रमुखहरूको सहभागिता थियो।
मन्त्री मेहताले स्वास्थ्य बिमा कार्यक्रम जनताको स्वास्थ्यसँग जोडिएको विषय भएकाले यसको प्रभावकारी कार्यान्वयनमा जोड दिइन्। कार्यक्रम कार्यान्वयनमा विद्यमान असहजता र यसलाई सुधार गर्ने उपायबारे छलफल भएको थियो। आम नागरिकको स्वास्थ्य सेवा पहुँच यस कार्यक्रमको प्रभावकारितामा निर्भर रहने भएकाले अवरोध आउन नहुनेमा उनले जोड दिइन्।
छलफलमा मन्त्रालयका सल्लाहकार डा. मनोहर प्रधान, सचिव डा. विकास देवकोटा, स्वास्थ्य बीमा बोर्डकी कार्यकारी निर्देशक शकुन्तला प्रजापति तथा काठमाडौं उपत्यकासहितका अधिकांश संघीय अस्पतालका प्रमुखहरू सहभागी थिए।
बैठकले स्वास्थ्य बीमा कार्यक्रमलाई थप प्रभावकारी बनाउने, अस्पतालहरूको सेवा प्रवाहमा देखिएका अवरोधहरू हटाउने र बिरामीमैत्री व्यवस्था सुनिश्चित गर्ने विषयमा केन्द्रित भएको छ। आगामी तीन महिनाभित्र कार्यान्वयन योजना तयार गरी लागू गरिने मन्त्री मेहताले बताइन्।
