चितवनको भरतपुर–२३ बेलहट्टामा शनिबार राति घरमै सुतिरहेका २५ वर्षीया आशिका बोटे र उनका चार वर्षीय छोरा भरतलाई जंगली हात्तीले कुल्चिएर ज्यान लियो।
जिल्ला प्रहरी कार्यालय, चितवनका सूचना अधिकारी चन्द्रभूषण यादवका अनुसार हात्ती धपाउने क्रममा आशिकाका श्रीमान् पूर्णले आगो बाले। त्यस क्रममा उनीहरूको कच्ची घरमा आगलागी भयो। प्रहरी र स्थानीयले आगो निभाएर थप क्षति रोके।
घटनालगत्तै स्थानीय जनप्रतिनिधि, सुरक्षा निकाय र निकुञ्ज प्रशासनबीच छलफल भयो। अनलाइनखबरका अनुसार, छलफलले जंगली हात्तीलाई तत्काल नियन्त्रणमा लिने सहमति गर्यो। चितवन राष्ट्रिय निकुञ्ज कार्यालयमार्फत मृतक परिवारलाई उचित राहत र घर निर्माणमा सहयोग गरिनेछ। मानव वन्यजन्तु द्वन्द्व न्यूनीकरणका लागि पनि आवश्यक काम गर्ने सहमति जुटेको छ।
