काठमाडौंको नागार्जुनस्थित नामग्याल विद्यालयमा दलाइ लामाको ९१औं जन्मदिन मनाइएको र विदेशी कूटनीतिज्ञ सहभागी भएकोमा चीनका लागि सात पूर्वराजदूतले गम्भीर आपत्ति जनाएका छन्। उनीहरूले नेपाल सरकारलाई ‘एक चीन नीति’ दृढतापूर्वक पालना गर्न आग्रह गरेका छन्।
राजेश्वर आचार्य, महेश मास्के, महेन्द्र पाण्डे, लीलामणि पौडेल, टंक कार्की, विष्णु पुकार श्रेष्ठ र कृष्णप्रसाद ओलीले संयुक्त प्रेस वक्तव्य जारी गरे। उनीहरूले नेपालले सधैं अवलम्बन गर्दै आएको एक चीन नीति स्मरण गराएका छन्। नेपालको भूमिबाट कुनै पनि मित्रराष्ट्रविरुद्ध प्रतिकूल गतिविधि हुन नदिने प्रतिबद्धता पनि दोहोर्याएका छन्।
वक्तव्यमा भनिएको छ, ‘हालै परराष्ट्रमन्त्री शिशिर खनालको चीन भ्रमणका क्रममा समेत यही प्रतिबद्धता पुनः दोहोर्याइएको थियो। यदि यो कार्यक्रम सरकारको सहमतिमा भएको हो भने त्यसले नेपालले चीनसँग कूटनीतिक सम्बन्ध स्थापना भएदेखि निरन्तर पालना गर्दै आएको एक चीन नीतिविपरीत सन्देश जानेछ।’
पूर्वराजदूतहरूले प्रश्न गरेका छन्, ‘के हामीले छिमेकसँगको परराष्ट्र नीति बदलेका हौं ?’ उनीहरूले यस्ता गतिविधिले नेपालको भूराजनीतिक सन्तुलनमा प्रतिकूल असर पार्न सक्ने चेतावनी दिए। यसले देशको स्थायित्व, विकास र स्वतन्त्रताका लागि प्रत्युत्पादक हुन सक्ने पनि बताएका छन्।
‘यस्तो गतिविधि हाम्रो देशको स्थायित्व, विकास र स्वतन्त्रताको लागि प्रत्युत्पादक हुने भएको हुँदा हामी नेपाल सरकार लगायत सबै सरोकारवालालाई सतर्क र सचेत रहन अपिल गर्दछौं,’ वक्तव्यमा भनिएको छ, ‘साथै भविष्यमा यस्ता गतिविधिहरू नदोहोरिने सुनिश्चितता प्रदान गर्न र छिमेकीसँगको सम्बन्धमा संवेदनशील हुन नेपाल सरकारको ध्यानाकर्षण गर्दछौं।’
पूर्वराजदूतहरूले सरकारलाई परराष्ट्रनीतिको घोषित प्रतिबद्धता दृढतापूर्वक कार्यान्वयन गर्न आग्रह गरे। नेपाल–चीन सम्बन्धका संवेदनशील विषयमा विशेष सावधानी अपनाउनुपर्नेमा उनीहरूले जोड दिएका छन्।
