देशका विभिन्न स्थानमा भारीदेखि अति भारी वर्षाको पूर्वानुमानले बाढी, पहिरो र डुबानको जोखिम बढाएको छ। यससँगै राष्ट्रिय विपद् जोखिम न्यूनीकरण तथा व्यवस्थापन प्राधिकरणले पूर्वतयारीलाई तीव्र बनाएको छ।
प्राधिकरणका निमित्त कार्यकारी प्रमुख प्रदीपकुमार कोइरालाका अनुसार नदीमा पानीको बहाव बढेर बाढीको जोखिम अवस्था आएमा आज (आइतबार) कोशी ब्यारेजका ढोका क्रमशः खोलिनेछन्। जल तथा मौसम विज्ञान विभागका बाढीविद् बिनोद पराजुलीले जलप्रवाहको निरन्तर निगरानी भइरहेको र २१ जिल्लामा बाढीको मध्यम जोखिम रहेको जानकारी दिएका छन्।
प्राधिकरणले सुरक्षा निकायसँग समन्वय गरी उद्धार तथा प्रतिकार्यका लागि आवश्यक तयारी थालेको छ। स्थानीय तह, सुरक्षा निकाय र सरोकारवाला निकायलाई उच्च सतर्कता अपनाउन तथा नदी किनार र पहिरोको जोखिम रहेका क्षेत्रमा विशेष सावधानी अपनाउन आग्रह गरिएको छ। सर्वसाधारणलाई यात्रा गर्दा र जोखिमयुक्त क्षेत्रमा अनावश्यक आवागमन नगर्न पनि प्राधिकरणले अनुरोध गरेको छ।
