गृह मन्त्रालयले सुनसरीमा दुई समूहबीच भएको झडपको छानबिन गर्न गठित समितिमा प्रहरी निरीक्षक दिपेश अवस्थी र प्रहरी उपरीक्षक मोहनसिंह धामीलाई सदस्यमा थप गरेको छ। मन्त्रालयले दुवैलाई ब्यालिस्टिक र फरेन्सिक विश्लेषणको जिम्मेवारी दिएको छ।
समितिलाई घटनाको प्रतिवेदन यथाशीघ्र बुझाउन निर्देशन दिइएको छ। गत सोमबार गृह मन्त्रालयका सहसचिव भुपेन्द्र थापाको संयोजकत्वमा पाँच सदस्यीय समिति गठन गरिएको थियो।
मन्त्रालयले सुनसरीलगायतका अन्य जिल्लामा यस्तै प्रकृतिका घटना हुन नदिन पूर्वतयारी सुरु गरेको छ। यसका लागि बाँके, कपिलवस्तु, धनुषा, सिरहा, सप्तरी लगायतका जिल्लामा शान्ति, सुव्यवस्था र सद्भाव कायम राख्न प्रमुख जिल्ला अधिकारीमार्फत समन्वय भइरहेको छ।
उक्त क्षेत्रमा सुरक्षा अनुगमन र समन्वय तीव्र पारिएको छ। गृहमन्त्री, सचिव र सुरक्षा निकायका प्रमुखहरूको उपस्थितिमा जिल्लागत सुरक्षा अवस्थाबारे गम्भीर समीक्षा गरिएको छ।
मन्त्रालयले वार्तामार्फत सुनसरीको समस्या समाधान गर्न पहल गरिरहेको छ। हाल सुनसरीको देवानगञ्ज लगायतका संवेदनशील क्षेत्रमा अवस्था सामान्य बन्दै गएको मन्त्रालयले जनाएको छ।
