नेपाल प्रहरीमा अनिवार्य अवकाशमा जानेको संख्याभन्दा दोब्बरले प्रहरीले अवधि नपुग्दै राजीनामा दिएर संगठन छाडेका छन्। आर्थिक वर्ष २०८२/०८३ मा ६८१ जना प्रहरी अनिवार्य अवकाशमा जाँदा १ हजार २६४ जनाले बिचमै राजीनामा दिएको प्रहरी प्रधान कार्यालयको वार्षिक प्रगति विवरणले देखाउँछ।
प्रहरी प्रवक्ता अविनारायण काफ्लेले ३० वर्षे सेवा अवधि, उमेरहद, कार्यबोझ र वैदेशिक रोजगारीको आकर्षणले तल्लो तहदेखि माथिल्लो तहसम्मका प्रहरी संगठन छाड्ने क्रम बढेको बताए। अनुभवी जनशक्ति यसरी बाहिरिँदा संगठनमा अनुभवको कमी हुनेछ। यसले नयाँ जनशक्ति भर्ना र तालिममा राज्यको लगानी खर्च हुने चुनौती थपिएको छ।
