रसुवाको भोटेकोशी नदीमा आएको विनाशकारी बाढीले अति उच्च जोखिममा पारेका ८८३ नागरिकलाई नेपाली सेनाले उद्धार गरेको छ। उद्धार गरिएकामध्ये ३५० जना अप्पर त्रिशूली हाइड्रोपावरको टनेलभित्र फसेका मजदुर र स्थानीयवासी थिए।
जोखिमपूर्ण परिस्थितिमा टनेलबाट ३५० जनाको उद्धार गरियो। सोही टनेलभित्र अझै १०० भन्दा बढी मानिस फसेको अनुमान छ। उनीहरूको उद्धारका लागि सेनाको टोली खटिएको छ।
नम्बर १ सेकेन्ड मुभमेन्ट ट्याक्टिकल हेडक्वार्टर (त्रिशुली) बाट जमदार भक्तजन बस्नेतको कमान्डमा १/३ को सैन्य टोलीले टनेल उद्धार गर्यो। सी क्यू आर टी धुन्चे ब्यारेक (रसुवा) बाट सह सेनानी अभिषेक शाहीको कमान्डमा १/५ को टोलीले अन्य स्थानबाट ५३३ जनाको उद्धार गर्यो।
सेनाले स्याफ्रुवेशी, टिमुरे, मैलुङ्ग, ठूलो हाकु र हाकु वेशीका जोखिममा परेकालाई सुरक्षित स्थानमा सार्यो।
