मधेस प्रदेशका मुख्यमन्त्री कृष्णप्रसाद यादवले नेपालले अन्तर्राष्ट्रिय समुदायसँग राहत मात्र नभई जलवायु परिवर्तनका कारण भएको क्षतिको न्यायसहित क्षतिपूर्ति माग्नुपर्ने बताएका छन्। रसुवाको भोटेकोशी बाढी प्रभावितका लागि जनकपुरधाम उद्योग वाणिज्य संघले संकलित राहत सामग्री सार्वजनिक गर्ने कार्यक्रममा उनले यस्तो धारणा राखे।
जलवायु परिवर्तनमा ठूलो योगदान गर्ने विकसित मुलुकका कारण नेपाल जस्ता राष्ट्रले प्राकृतिक विपत्तिको मार खेप्नुपरेको यादवको दाबी छ। चीन, भारत र अमेरिका जस्ता मुलुकको कार्बन उत्सर्जनले नेपालमा बाढी, पहिरो र हिमताल पग्लिने विपत्ति निम्त्याएको उनले बताए। नेपालले अन्तर्राष्ट्रिय मञ्चमा जलवायु न्यायको विषय सशक्त रूपमा उठाउनुपर्ने र सङ्घीय सरकारले पनि विशेष पहल गर्नुपर्नेमा उनले जोड दिए।
भोटेकोशीमा बाढी आएकै दिन प्रदेश सरकारले राहत उपलब्ध गराउने निर्णय गरेको थियो। प्रदेश सरकारका मन्त्री र कर्मचारीको एक दिनको तलब प्रधानमन्त्री दैवी प्रकोप उद्धार कोषमा जम्मा गरियो। दोस्रो चरणमा करिब दुई करोड रुपैयाँ बराबरको टेन्ट र कम्बल बाढी प्रभावित क्षेत्रमा पठाउने तयारी छ। तेस्रो चरणमा खाद्यान्न, लत्ताकपडा र अन्य अत्यावश्यक सामग्री पठाउने योजना छ। यसअघि प्रदेश सरकारले भोटेकोशी र त्रिशूली क्षेत्रका बाढी प्रभावितलाई करिब एक करोड ९६ लाख रुपैयाँ बराबरको राहत सामग्री पठाउने निर्णय गरेको थियो।
जनकपुरधाम उद्योग वाणिज्य संघले खाद्यान्न, लत्ताकपडा, जुत्ताचप्पल, कम्बल र भाँडाकुँडा संकलन गरेको छ। संकलित सामग्रीमा ७५ बोरा चामल, २१ बोरा सोयाबिन, दाल, नुन, चिउरा, मुरही र चाउचाउ छन्। विभिन्न प्रकारका लत्ताकपडा, बेडसिट, टावेल, बालबालिकाका कपडा र एक सिलाई मेसिन पनि संकलन गरियो। दैनिक भान्साका लागि ७५ थान तावा, ७५ थान कराही, २०० थान थाली, २०० थान कचौरा र २०० थान गिलास पनि समावेश छ।
विपद्को समयमा जनकपुरधामका उद्योगी, व्यवसायी र नागरिकले देखाएको सहयोगको प्रशंसा गर्दै मुख्यमन्त्री यादवले राहत सामग्री वास्तविक पीडितसम्म न्यायोचित रूपमा पुर्याउन आग्रह गरे। नेपालले पटक-पटक विपत्तिको सामना गर्नुपरेकाले सबै क्षेत्र र समुदाय एकजुट भएर सहयोगमा जुट्नुपर्ने उनले बताए।
जनकपुरधाम उद्योग वाणिज्य संघका राहत संकलन समिति संयोजक जितेन्द्र महासेठले व्यवसायी र संघसंस्थाको सहकार्यमा सामग्री संकलन गरिएको जानकारी दिए। संकलित राहत सामग्री लिएर संघको टोली बुधबार बिहान बाढी प्रभावित क्षेत्रतर्फ प्रस्थान गरिसकेको छ।
