आमालाई कम्तीमा ६ महिना र बुबालाई ४२ दिन तलबसहितको प्रसूति स्याहार बिदा उपलब्ध गराउने प्रस्ताव स्वास्थ्य तथा खाद्य सुरक्षा मन्त्रालयले अघि बढाएको छ। यो प्रस्ताव सुरक्षित मातृत्व तथा प्रजनन स्वास्थ्य अधिकार ऐन, २०७५ संशोधनको मस्यौदामा समेटिएको छ।
हाल कायम ९८ दिनको प्रसूति बिदालाई बढाएर ६ महिना पुर्याउने यो प्रस्तावले मातृत्वलाई महिलाको मात्र जिम्मेवारीका रूपमा हेर्ने सोचाइमा परिवर्तन ल्याउने अपेक्षा गरिएको छ। यसका साथै, प्रसूति सेवा दिने स्वास्थ्य संस्थामा दक्ष स्वास्थ्यकर्मीको व्यवस्था, सम्मानजनक प्रसूति सेवा र गर्भवती तथा सुत्केरी महिलामाथि हुने हिंसा रोक्ने कानुनी व्यवस्था पनि प्रस्तावमा समेटिएका छन्।
स्वास्थ्य तथा खाद्य सुरक्षा मन्त्री निशा मेहताले बच्चा जन्माउनु प्राकृतिक प्रक्रिया भए पनि हुर्काउनु आमाको मात्र जिम्मेवारी नभएको बताइन्। ‘जीवनमा सीमित पटक आउने मातृत्व र पितृत्वको विशेष समयमा अभिभावकले नवजात शिशु र परिवारलाई पर्याप्त समय दिन सक्ने वातावरण निर्माण गर्नु राज्यको जिम्मेवारी पनि हो,’ मन्त्री मेहताले भनिन्।
मन्त्रालयले बदलिँदो पारिवारिक संरचना, जीवनशैली र मातृ तथा नवजात शिशुको स्वास्थ्य आवश्यकतालाई ध्यान राखी यो संशोधन प्रक्रिया अघि बढाएको जनाएको छ। यसअघि विधेयकको मस्यौदा सार्वजनिक गरी सरोकारवालाबाट सुझाव समेत मागिएको थियो। कानुन मन्त्रालयबाट प्रक्रिया पूरा भएपछि यो विधेयक मन्त्रिपरिषद्मा पेस हुनेछ।
