स्वास्थ्य सेवा विभागका वरिष्ठ स्वास्थ्य प्रशासक डा. अर्जुनप्रसाद सापकोटा र उनकी श्रीमती निरजा पण्डितविरुद्ध अख्तियार दुरुपयोग अनुसन्धान आयोगले गैरकानुनी सम्पत्ति आर्जन गरेको अभियोगमा विशेष अदालत काठमाडौंमा आरोपपत्र दायर गरेको छ।
सापकोटाले २०५३ साउन २५ देखि २०८० वैशाख ३० सम्मको अवधिमा ३ करोड ३५ लाख ७७ हजार २६० रुपैयाँ ३४ पैसा वैधानिक आय आर्जन गरेका थिए। तर, सोही अवधिमा उनले ५ करोड ३९ लाख ७१ हजार ८७५ रुपैयाँ ५८ पैसा खर्च गरेको अनुसन्धानले देखाएको छ।
आयोगका अनुसार सापकोटाको २ करोड ३ लाख ९४ हजार ६१५ रुपैयाँ २४ पैसा बराबरको सम्पत्तिको स्रोत खुलेको छैन। यही रकमलाई बिगो कायम गरी भ्रष्टाचार निवारण ऐनअनुसार उनीविरुद्ध कैद तथा जरिवानाको मागदाबी गरिएको छ।
अख्तियारले सापकोटाले सार्वजनिक पद दुरुपयोग गरी अस्वाभाविक जीवनयापन गरेको र झुट्टा सम्पत्ति विवरण पेस गरेको दाबी गरेको छ।
अनुसन्धानमा स्रोत नखुलेको सम्पत्तिबाट श्रीमती निरजा पण्डितको नाममा समेत घरजग्गा खरिद गरेको पाइएको छ। उक्त सम्पत्ति जफत गर्ने प्रयोजनका लागि पण्डितलाई प्रतिवादी बनाइएको छ।
