सरकारले स्वास्थ्य क्षेत्र सुधारका लागि अमेरिकी सरकारबाट २०.७ मिलियन डलर अनुदान सहायता स्वीकार गर्ने निर्णय गरेको छ। अर्थ मन्त्रालयको प्रस्तावमा उक्त वैदेशिक अनुदान सहायता स्वीकार गर्ने निर्णय भएको हो।
सरकारका प्रवक्ता तथा शिक्षामन्त्री सस्मित पोखरेलले विभिन्न तीनवटा विधेयक संघीय संसद्मा पेस गर्न स्वीकृति दिइएको बताए। संघीय निजामती सेवासम्बन्धी कानुन संशोधन र एकीकरण गर्न बनेको विधेयक, पशु वधशाला तथा मासु जाँच ऐन, २०५५ संशोधन गर्न बनेको विधेयक र अपाङ्गता भएका व्यक्तिको अधिकारसम्बन्धी ऐन, २०७४ संशोधन गर्न बनेको विधेयक संसद्मा पेस गरिनेछन्।
पूर्वाधार विकास र राष्ट्रिय सुरक्षासँग सम्बन्धित संरचना निर्माणका लागि राष्ट्रिय वन क्षेत्र उपयोग गर्न दिइनेछ। यसमा पूर्व–पश्चिम राजमार्गको कमला–ढल्केवर–पथलैया सडक खण्ड, गर्जाङ खोला र बलेफी खोला जलविद्युत् आयोजनाका लागि राष्ट्रिय वन क्षेत्रको जग्गा उपयोग गरिनेछ।
सशस्त्र प्रहरी बल नेपालका तालिम शिक्षालय, गुल्म तथा सीमा सुरक्षा पोस्ट (बीओपी) निर्माणका लागि पनि राष्ट्रिय वन क्षेत्र उपयोग गर्न दिने निर्णय भएको प्रवक्ता पोखरेलले जानकारी दिए।
मन्त्रिपरिषद् बैठकले निजामती प्रशासनका दुई सहसचिवलाई सचिव पदमा बढुवा गरी पदस्थापन गरेको छ। नेपाल प्रशासन सेवाका सहसचिव आवास श्रेष्ठ कर्ण गण्डकी प्रदेशको मुख्यमन्त्री तथा मन्त्रिपरिषद्को कार्यालयको प्रमुख सचिवमा पदस्थापन भएका छन्।
नेपाल इन्जिनियरिङ सेवाका डा जगदीश्वर कर्माचार्य ऊर्जा, जलस्रोत तथा सिँचाइ मन्त्रालयको सचिवमा पदस्थापन भएका छन्।
प्रवक्ता पोखरेलले पूर्वप्रधानन्यायाधीश चोलेन्द्रशमशेर जबरालाई पक्राउ वा नियन्त्रणमा नलिइएको स्पष्ट पारे। परिवारको सुरक्षा मागपछि उनलाई उद्धार गरी सुरक्षित स्थानमा राखिएको उनको भनाइ थियो।
खेलकुद क्षेत्रबारे पोखरेलले घरेलु लिग सञ्चालनको तयारी भइरहेको बताए। देशभर २७ स्थानमा खेल पूर्वाधार निर्माणको काम अघि बढाइएको छ।
