२०४५ पछिकै भीषण वर्षाले हुम्लाका सबै सडक अवरुद्ध, खाद्यान्न ढुवानी ठप्प भएको छ।
गत शुक्रबारदेखि करिब ५० घण्टासम्म लगातार परेको वर्षाले चीनसँगको सीमा जोड्ने सिमकोट-हिल्सा सडक, कर्णाली करिडोर तथा जिल्लाका सातवटै गाउँपालिकाका ग्रामीण सडकमा व्यापक क्षति पुर्याएको छ। यसबाट खाद्यान्न, दैनिक उपभोग्य सामग्री ढुवानी, बिरामीको आवागमन तथा अत्यावश्यक सेवासमेत प्रभावित भएका छन्।
जिल्ला प्रहरी कार्यालयका प्रमुख प्रहरी नायब उपरीक्षक शङ्कर खड्काका अनुसार वर्षापछि सडकका विभिन्न स्थानमा पहिरो र बाढीले कल्भर्ट बगाउँदा अवरुद्ध भएको छ। कर्णाली करिडोरअन्तर्गत कवाडीदेखि हिल्सासम्मको खण्डमा ४० भन्दा बढी स्थानमा पहिरो खसेको छ। कवाडी-गिउसी सडकखण्ड सञ्चालनमा ल्याइए पनि माथिल्लो खण्ड खोल्ने प्रयास जारी छ। प्रमुख जिल्ला अधिकारी भोलानाथ गुरागाईले ग्रामीण सडकमा ७० भन्दा बढी स्थानमा पहिरो खसेर अवरुद्ध भएको जानकारी दिए। अदानचुली गाउँपालिका केन्द्रदेखि वडा नं ५ र ६ जाने सडक अवरुद्ध हुँदा विद्यार्थीलाई विद्यालय जानसमेत समस्या भएको वडा नं ५ का वडा सदस्य सिंह बोहोराले बताए।
सडक अवरुद्ध भएपछि असोज १० गतेका लागि तय गरिएको नेपाली कांग्रेसको प्रदेश अधिवेशन तीन दिनपछि असोज १३ गते मात्र सम्पन्न भएको थियो। अदानचुली गाउँपालिका-१ का प्रतिनिधि उब्जन थापाका अनुसार, सडक अवरोधले तल्लो क्षेत्रबाट सिमकोट पुगेका प्रतिनिधिलाई दुई दिनसम्म लागेको थियो। उत्तरी हुम्लाको नाम्खा गाउँपालिका-५ को नारा लेक र वडा नं ६ को लिमी जाने न्यालु लेकमा करिब साढे तीन फिट हिउँ जमेकाले ती सडक बन्द छन्। हिउँ नपन्छाएसम्म सडक सञ्चालनमा ल्याउन कठिन हुने प्रहरीले जनाएको छ।
हुम्लामा पछिल्लो २१ दिनदेखि विद्युत् अवरुद्ध छ, जसले गर्दा सञ्चार सेवा पनि प्रभावित भएको छ। प्रहरी नायब उपरीक्षक खड्काका अनुसार विद्युत् अवरोधले क्षतिको पूर्ण विवरण सङ्कलनमा कठिनाइ भइरहेको छ। विद्युत् मर्मतका सामग्री नेपालगञ्जमा छन्, तर हवाई उडान प्रभावित हुँदा हुम्ला ल्याउन सकिएको छैन। सामग्री पुगेपछि सेवा सञ्चालनमा करिब एक साता लाग्ने अनुमान छ।
सहायक प्रमुख जिल्ला अधिकारी चन्द्रवीर शाहीका अनुसार, अवरुद्ध सडक खुलाउन आइतबार (२०८३ असोज ११ गते) देखि जिल्ला प्रशासन कार्यालयमा कमान्ड पोस्टको बैठक नियमित बसेर समन्वय भइरहेको छ। पहिरो पन्छाउन दुईदेखि तीन दिन लाग्ने अनुमान छ। ग्रामीण सडक पूर्ण सञ्चालनमा ल्याउन कम्तीमा दुई दिन लाग्नेछ। कमान्ड पोस्टबाट सडक खुलाउने समन्वयबाहेक अन्य ठोस निर्णयबारे थप जानकारी छैन।
