नेपाली कांग्रेसको १५औँ महाधिवेशनअन्तर्गत केन्द्रीय कार्यसमितिको निर्वाचनका लागि आज असोज २० गते दिउँसो साढे १२ बजेदेखि उम्मेदवारी मनोनयन सुरु हुँदैछ।
महाधिवेशनमा भाग लिने ७ हजार ११४ महाधिवेशन प्रतिनिधिको अन्तिम नामावली प्रकाशन भएसँगै निर्वाचन प्रक्रिया अघि बढेको हो। नेपाली कांग्रेस केन्द्रीय निर्वाचन समितिका सदस्य सचिव राजु कटुवालले मतदाताको अन्तिम नामावली प्रकाशन गरिएको जानकारी दिएका छन्। उम्मेदवारी मनोनयन दर्ता आज दिउँसो ४:०० बजेसम्मका लागि तोकिएको छ।
आज बिहान १०:०० बजेदेखि उम्मेदवारका लागि मनोनयन फारम वितरण सुरु भएको थियो। बिहान ९:३० बजेसम्म मतदाता नामावलीमाथि दाबी विरोधका लागि समय निर्धारण गरिएकोमा १०:३० बजेसम्म जाँचबुझ गरी ११:३० बजे अन्तिम मतदाता नामावली प्रकाशन गरिएको थियो।
महाधिवेशनको बन्दसत्रले पारित गरेको नयाँ संशोधित विधानअनुसार नेपाली कांग्रेसको केन्द्रीय कार्यसमिति २९७ सदस्यीय हुनेछ। पदाधिकारीको सङ्ख्या १४ बाट बढाएर २६ पुर्याइएको छ। नयाँ संरचनाअनुसार १ सभापति, १ वरिष्ठ उपसभापति, ४ उपसभापति (अनिवार्य १ महिला), ३ महामन्त्री (अनिवार्य १ महिला), १५ सहमहामन्त्री र १ कोषाध्यक्ष (केन्द्रीय सदस्यहरूमध्येबाट मनोनीत हुने) रहनेछन्।
आजै दिउँसो ४:३० बजे उम्मेदवारहरूको प्रथम नामावली प्रकाशन गरिनेछ। सोही दिन बेलुका ७:०० बजे उम्मेदवारको दोस्रो नामावली प्रकाशन हुने कार्यतालिका छ। असोज २१ गते उम्मेदवारी फिर्ता लिने र उम्मेदवारको अन्तिम नामावली प्रकाशन गरिनेछ भने असोज २२ गते मतदान कार्यक्रम सञ्चालन हुनेछ।
मतदानका लागि राष्ट्रिय सभा गृह, खुलामञ्च र नेपाल प्रज्ञा प्रतिष्ठानमा छुट्टाछुट्टै मतदान केन्द्र तोकिएको छ। मधेश प्रदेशका प्रतिनिधिहरूले खुलामञ्चमा मतदान गर्न पाउनेछन्। नयाँ केन्द्रीय कार्यसमितिमा मधेशी महाधिवेशन प्रतिनिधिमध्येबाट पाँच महिलासहित तेह्र जना सदस्य रहने व्यवस्था गरिएको छ।
