सप्तरीको डाक्नेश्वरी नगरपालिका–८ कट्टी परवाहा टोलमा पाँच वर्षीय बालक सुमित मण्डलको सर्पदंशबाट मृत्यु भएको छ। बुधबार घरको आँगनमा खेलिरहेका बेला सर्पले डसेपछि परिवारले तत्काल अस्पताल लैजानुको सट्टा धामीझाँक्री बोलाएर झारफुक गराउँदा उनको ज्यान गएको हो।
करिब आधा घण्टासम्म झारफुकमा समय बिताएपछि बालकको अवस्था गम्भीर बन्यो। त्यसपछि उनलाई कल्याणपुरस्थित सर्पदंश उपचार केन्द्र लगियो। त्यहाँबाट थप उपचारका लागि राजविराजस्थित छिन्नमस्ता अस्पताल र पछि गजेन्द्रनारायण सिंह अस्पताल पुर्याइयो। तर, चिकित्सकले उनलाई मृत घोषणा गरे।
अस्पताल पुग्नुअघि नै मृत्यु, धामीको घरमा शव
गजेन्द्रनारायण सिंह अस्पतालका मेडिकल सुपरिटेन्डेन्ट डा. रञ्जित झाका अनुसार बालकलाई अस्पताल पुर्याउनुअघि नै उनको मृत्यु भइसकेको थियो। डा. झाले भने, ‘सुमितलाई सुरुमै अस्पताल पुर्याइएको भए ज्यान जोगिन सक्थ्यो होला।’
अस्पतालले मृत घोषणा गरेपछि पनि आफन्तले अन्धविश्वासका कारण शवलाई अस्पतालको प्रवेशद्वारमा राखेर पुनः झारफुक गराए। त्यतिले नपुगेर उनीहरूले शवलाई सीमावर्ती भारतीय बजार महादेवमण्ठस्थित एक धामीको घरमा समेत लगेका थिए।
बिहीबार मात्र आफन्तले शव पोस्टमार्टमका लागि गजेन्द्रनारायण सिंह अस्पतालमा बुझाएका छन्। चिकित्सकहरूका अनुसार, सर्पदंशको घटनामा अस्पताल जानुको सट्टा झारफुकमा समय बिताउने प्रवृत्तिले बालबालिकाको जीवन जोखिममा पर्छ।
