महाभियोगको त्रासका कारण बिचौलिया आरोपमा पक्राउ परेका इनम सापकोटासँग भेट भएको सर्वोच्च अदालतका न्यायाधीश हरिप्रसाद फुयालले स्वीकार गरेका छन्। सर्वोच्च अदालत परिसरमा बिहीबार सञ्चारकर्मीहरूसँग कुरा गर्दै न्यायाधीश फुयालले तत्कालीन समयमा आफूहरूसहित केही न्यायाधीशविरुद्ध महाभियोगको प्रस्ताव आउने चर्चा चलिरहेको र त्यही त्रासपूर्ण मनोविज्ञानका बीच ‘प्रधानमन्त्रीको मान्छे’ भन्दै सापकोटा सम्पर्कमा आएपछि भेटघाट भएको खुलाएका हुन्।
न्यायाधीश फुयालले आफू आर्थिक वा नैतिक रूपमा विचलित नभएको दाबी गरे। उनले सापकोटाले विभिन्न मुद्दामा निरन्तर दबाब दिन थालेपछि प्रधानमन्त्री र प्रधानसेनापतिको सचिवालयमा आफैँले उजुरी गरेको समेत खुलासा गरेका छन्।
‘प्रधानमन्त्रीको मान्छे’ भन्दै सम्पर्क
न्यायाधीश फुयालका अनुसार, महाभियोगको त्रास चलिरहेको बेला सापकोटा सर्वोच्च, विशेष र उच्च अदालतका न्यायाधीशहरूको सम्पर्कमा पुगेका थिए। फुयाललाई भेट्नुअघि नै उनले अन्य तीन जना न्यायाधीशसँग भेट गरिसकेका थिए।
‘तत्कालीन अवस्थामा उनले आफूलाई प्रधानमन्त्री बालेन शाहको मानिस भनेर चिनाएका थिए,’ फुयालले सञ्चारकर्मीसँग भने, ‘उनले आफूलाई नजिकको छिमेकी देशको मेडिकल डाक्टर हुँ र दूतावासमा गोप्य रूपमा काम गर्छु भनेर परिचय दिएका थिए।’ सापकोटाले सत्तारूढ दलकै सभापतिसम्म पहुँच भएको दाबी गर्दै न्यायाधीशहरूलाई महाभियोग नलाग्ने भनेर आश्वस्त पार्न खोजेको फुयालको भनाइ छ।
सुरुवाती दुई महिना सापकोटाले स्वतन्त्र न्यायपालिकाको पक्षमा राम्रो कुरा गरेको र तत्कालीन प्रधानन्यायाधीश मनोज शर्मालाई आफैँले प्रधानन्यायाधीश बनाएको सम्मको दाबी गरेको फुयालले बताए। महाभियोगको त्रासमा रहेका न्यायाधीशहरूले ‘नयाँ प्रधानमन्त्रीसँग सिधै सम्पर्क भएको मान्छे काम लाग्न सक्छ’ भन्ने सोचेर उनीसँग सम्पर्क बढाएको फुयालको भनाइ छ।
मुद्दामा ‘सेटिङ’ प्रयास
सम्पर्क बाक्लिँदै गएपछि सापकोटाले मुद्दाहरूमा चासो देखाउन थालेका थिए। सुरुमा सुदूरपश्चिमका एक विवादास्पद इन्सुरेन्स व्यक्तिको मुद्दामा कुरा गरेपछि फुयाललाई शंका लाग्न थालेको थियो। पछि सापकोटाले म्यासेजमार्फत विभिन्न मुद्दामा दबाब दिन थाले।
विशेषगरी व्यवसायी रोहित गुप्ताको बन्दीप्रत्यक्षीकरण र विशेष अदालतको आदेशविरुद्धको मुद्दामा सापकोटाले ‘प्रधानमन्त्रीको रिफरेन्स’ दिँदै गुप्ताको निवेदन खारेज गरी थुनामै राख्न म्यासेज पठाएका थिए। तर, फुयालसहितको इजलासले गुप्तालाई थुनामा राख्नुपर्ने आधार नदेखेपछि २ करोड धरौटी माग गरेको थियो।
गुप्ता प्रकरणलगत्तै ‘प्रधानमन्त्रीको विहाफमा भेट्न खोजेको हो भने भेटौँ’ भन्दै फुयालसहितका केही न्यायाधीशहरूले सापकोटालाई हिमालयन होटलमा भेटेका थिए। उक्त भेटमा सापकोटाले ठूलो स्वरमा ‘तपाईंहरूसँग प्रधानमन्त्री खुसी हुनुहुन्न, महाभियोग अघि बढ्ने भयो’ भन्दै धम्क्याएको फुयालले बताए। यसअघि एनएमखबरले न्यायाधीश फुयालले बिचौलिया सापकोटालाई होटलमा भेट्न प्रस्ताव गरेको खुलासा गरेको थियो। कांग्रेसका मुद्दापछि सापकोटाले दीपक भट्टको बन्दीप्रत्यक्षीकरण मुद्दामा सबैभन्दा धेरै दबाब दिएको फुयालको खुलासा छ।
प्रधानमन्त्री र सेनापतिलाई उजुरी
होटलमा भेट्दा सापकोटाले आफ्नो बिल अरू कसैको नाममा राख्न लगाएपछि न्यायाधीशहरू झन् सशंकित भएका थिए। त्यसपछि फुयालले प्रहरी महानिरीक्षक (आईजीपी) को सचिवालयमा अनौपचारिक रूपमा बुझ्दा, उताबाट ‘उनी हाइप्रोफाइलसँग सम्बन्ध देखिएका व्यक्ति हुन्, हामी पनि जोगिएर बसेका छौँ, तपाईंहरू पनि जोगिनुहोला’ भन्ने सन्देश आएको थियो। प्रहरीकै जवाफले आफूहरूलाई थप त्रास र दबाब महसुस भएको फुयालले बताए।
दबाब अति नै भएपछि न्यायाधीशहरूले सापकोटाको फोटो, सम्पर्क नम्बर र सञ्चारका सबै विवरणहरू खुलाएर प्रधानमन्त्री र प्रधानसेनापतिको सचिवालयमा पठाएका थिए। ‘जवाफमा प्रधानमन्त्री कार्यालयले यो मानिसका बारेमा आफूहरूले पनि हल्ला सुनेको तर कतै देखेको र चिनजान नभएको जानकारी दियो,’ फुयालले भने, ‘पछि प्रधानमन्त्री यो मान्छेसँग रिसाउनुभएको थियो भन्ने सुन्यौँ।’
‘आर्थिक लेनदेन छैन, कारबाही भोग्न तयार छु’
सार्वजनिक भएका कुराकानीका विवरणहरू प्रहरी अनुसन्धानको फाइलमा नरहेको दाबी गर्दै फुयालले यो कसरी बाहिर आयो भन्नेमा आफू आश्चर्यमा परेको बताए। उनले इनम सापकोटासँग कुनै पनि प्रकारको आर्थिक कुराकानी वा लेनदेन नभएको प्रष्ट पारेका छन्।
‘म आफू आर्थिक, नैतिक र आचरणगत कुरामा कहीँ कतै विचलित नभएको व्यक्ति हुँ,’ उनले भने, ‘यो प्रकरणको पहिलो सूचना हामीले नै दिएका हौँ। यसमा गम्भीर रूपमा अनुसन्धान होस्। यदि हामी दोषी देखिन्छौँ भने म लगायत अरू न्यायाधीशहरूलाई कारबाही होस्, म त्यसका लागि तयार छु।’
