बाराको फेटा गाउँपालिकामा अस्पताल उद्घाटनको विवादले गोलीबारीमा परि एक जना घाइते भएपछि प्रधानमन्त्री कार्यालयले तत्काल थप उपचारका लागि हेलिकप्टरबाट काठमाडौँ ल्याउन निर्देशन दिएको छ। प्रधानमन्त्री कार्यालयको सचिवालयमार्फत यो निर्देशन जारी भएको हो।
प्रधानमन्त्री कार्यालयले यस घटनाप्रति दुःख व्यक्त गर्दै गम्भीर ध्यानाकर्षण भएको जनाएको छ। सचिवालयका अनुसार, घटनामा संलग्न र घटना गराउने वातावरण सिर्जना गर्ने लगायत सबैलाई आवश्यक कानुनी दायरामा ल्याइनेछ। यसका लागि सम्बन्धित सबै निकायसँग छलफल भइरहेको छ।
प्रधानमन्त्रीको सचिवालयले शान्ति कायम राख्न र कुनै किसिमले अरूको बहकावमा नआउन सबैमा अनुरोध गरेको छ। यस घटनालाई बढावा नदिन पनि सम्बन्धित सबैलाई हार्दिक अनुरोध गरिएको छ। घाइतेको शीघ्र स्वास्थ्यलाभको कामना गर्दै परिवारजनलाई धैर्य धारण गर्न पनि सचिवालयले आग्रह गरेको छ।
