नेपाल प्रिमियर लिग (एनपीएल) अन्तर्गत कीर्तिपुरस्थित टीयू अन्तर्राष्ट्रिय क्रिकेट मैदानमा आज भएको खेलमा विराटनगर किंग्सले पोखरा एभेन्जर्सलाई ४ विकेटले पराजित गरेको छ। विराटनगरका बलर सन्दीप लामिछानेको प्रदर्शन जितमा निर्णायक बन्यो।
पोखरा एभेन्जर्सले टस जितेर पहिले ब्याटिङ गर्दै १७.५ ओभरमा सबै विकेट गुमाएर १३२ रन बनाएको थियो। पोखराका लागि युवराज समराले आक्रामक ब्याटिङ गर्दै ४७ बलमा ८४ रन बनाए। उनको इनिङ्समा ७ चौका र ५ छक्का सामेल थिए। धनन्जय लक्षणले २२ रन जोडे। विराटनगरका सन्दीप लामिछानेले ४ ओभरमा २७ रन खर्चेर ६ विकेट लिए भने रूपेश सिंहले ०.५ ओभरमा २ रन दिएर १ विकेट लिए।
सन्दीपको घातक स्पेलले मोडियो खेल
१३३ रनको लक्ष्य पछ्याएको विराटनगर किंग्सले १९.२ ओभरमा ६ विकेट गुमाएर १३६ रन बनाउँदै जित हासिल गर्यो। विराटनगरका लागि बसिर अहमेदले ३९ बलमा ३७ रन, लोकेश बमले २७ बलमा ३३ रन र इसुरु उदानाले १२ बलमा २५ रनको योगदान दिए। पोखराका कुशल भुर्तेल र रमेश मेंडिसले समान २-२ विकेट लिए।
सन्दीप लामिछानेले ११औँ ओभरमा २ विकेट तथा १५औँ ओभरमा ३ विकेट लिएर पोखराको मध्यक्रम ध्वस्त पारेका थिए। युवराज समराले ३२ बलमा अर्धशतक पूरा गर्दै पोखरालाई खेलमा फर्काउने प्रयास गरे पनि सन्दीपको स्पेलसामु उनको प्रयास पर्याप्त भएन।
यो जितसँगै विराटनगर किंग्स अंक तालिकाको चौथो स्थानमा उक्लिएको छ। उसले ६ खेलबाट ६ अंक जोडेको छ। पोखरा एभेन्जर्स भने ६ खेलबाट २ अंकसहित आठौँ स्थानमा यथावत् छ।
