नेपाल प्रिमियर लिग (एनपीएल) २०२६ अन्तर्गत शुक्रबार कीर्तिपुरस्थित टीयू अन्तर्राष्ट्रिय क्रिकेट मैदानमा भएको खेलमा चितवन राइनोजले जनकपुर बोल्ट्सलाई ४ विकेटले पराजित गरेको छ। जनकपुरले दिएको ८९ रनको लक्ष्य चितवनले १७.२ ओभरमा ६ विकेट गुमाएर पूरा गर्यो।
टस जितेर पहिले ब्याटिङ गरेको जनकपुर बोल्ट्सले निर्धारित २० ओभरमा ९ विकेट गुमाएर ८८ रन मात्र बनाउन सक्यो। जनकपुरका हरमीत सिंहले २५ बलमा २५ रन (२ चौका, १ छक्का) र विशाल सुस्लिङले १२ बलमा १५ रन (१ चौका, १ छक्का) जोडे। राहुल यादव १० बलमा १० रन बनाएर नटआउट रहे। चितवनका रन्जित कुमारले ३ ओभरमा २ रन खर्चेर ३ विकेट लिए भने सिकन्दर रजाले ४ ओभरमा १० रन दिएर २ विकेट हात पारे।
जवाफी ब्याटिङमा चितवन राइनोजले सुरुवाती विकेट गुमाए पनि डेविड मलानले धैर्यपूर्ण ब्याटिङ गर्दै टोलीलाई जित दिलाए। उनले ३९ बलमा नटआउट ३५ रन (१ छक्का) बनाए। कुशल मल्लले २५ बलमा १५ रन (१ चौका) र रवि बोपाराले १५ बलमा १३ रन (३ चौका) को योगदान दिएका थिए। जनकपुरका राहुल यादवले ३ ओभरमा १९ रन खर्चेर ३ विकेट लिए भने ललित राजवंशीले ३.२ ओभरमा २३ रन दिएर २ विकेट लिए।
जनकपुरको ब्याटिङ संघर्ष
जनकपुर बोल्ट्सको इनिङ्स सुरुदेखि नै दबाबमा देखियो। पावरप्ले (१–६ ओभर) मा २२ रन बनाउँदा महत्वपूर्ण ३ विकेट गुमाउन पुग्यो। बीचका ओभरहरूमा पनि ठूलो साझेदारी बन्न सकेन। जनकपुरको इनिङ्समा ७० बलमा रन नआउनु र जम्मा ९ बाउन्ड्री (५ चौका, ४ छक्का) मात्र प्रहार हुनुले ब्याटिङको संघर्ष झल्काउँछ।
यो जितसँगै चितवन राइनोज अंक तालिकाको चौथो स्थानमा उक्लिएको छ। ६ खेलमा ७ अंकका साथ चितवनले प्लेअफको सम्भावनालाई थप बलियो बनाएको छ। उता, जनकपुर बोल्ट्स भने ७ खेलमा ४ अंकसहित छैटौँ स्थानमा यथावत् छ।
