सर्लाहीका ६ मेयरहरूको साझा निष्कर्ष: सार्वजनिक बिदाले मधेशमा शिक्षा र स्वास्थ्य सेवामा अवरोध

सर्लाहीको हरिवन नगरपालिकामा शुक्रबार सम्पन्न ६ नगरपालिकाका प्रमुखहरूको बैठकले सार्वजनिक बिदाका कारण मधेश प्रदेशमा शिक्षा र स्वास्थ्य सेवामा अवरोध पुगेको भन्दै बिदा व्यवस्थापनमा पुनर्विचार गर्नुपर्ने निष्कर्ष निकालेको छ।हरिवन नगरपालिकाका नगर प्रमुख रमेश बुढाथोकीको अध्यक्षतामा बसेको यस महत्त्वपूर्ण बैठकमा ईश्वरपुर, बरहथवा, लालबन्दी, हरिपुर तथा बागमती नगरपालिकाका प्रमुखहरू सहभागी थिए। उनीहरूले विशेषगरी शिक्षा संस्था सञ्चालन, स्वास्थ्य संस्था सञ्चालन तथा सरकारी एवं सार्वजनिक जग्गा अतिक्रमणसम्बन्धी समसामयिक विषयमा गहन छलफल गरेका छन्।यस बैठकले विद्यालयमा गुणस्तर कायम राख्दै पठनपाठन नियमित गर्न सार्वजनिक बिदा सम्बन्धी व्यवस्थामा पुनर्विचार गर्नुपर्ने निष्कर्ष निकालेको छ। यसका लागि नेपाल सरकार तथा प्रदेश सरकारसँग आवश्यक समन्वय र सहकार्य गर्ने निर्णय पनि मेयरहरूले गरेका छन्।त्यसैगरी, स्वास्थ्य संस्थाको हकमा पनि सार्वजनिक बिदाका कारण सेवा प्रवाहमा असर परेको भन्दै अत्यावश्यक सेवाहरू निरन्तर सञ्चालन हुने वातावरण सुनिश्चित गर्नुपर्नेमा जोड दिइएको छ। स्वास्थ्य सेवा प्रभावकारी बनाउन बिदा व्यवस्थापनमा सुधार गर्न सरकारसँग अनुरोध गर्ने निर्णय बैठकले गरेको छ।बैठकले हालै सरकारले जारी गरेको १०० बुँदे सुधार कार्यसूचीअनुसार भूमिहीन, दलित, सुकुमबासी तथा अव्यवस्थित बसोबासीहरूको पहिचान गरी उचित व्यवस्थापन गर्न आवश्यक प्रक्रिया अघि बढाउन आग्रह गर्ने निर्णय गरेको छ।बैठकले यी विषयमा प्रदेश सरकारसँग समेत सहकार्य गर्दै आवश्यक पहल अगाडि बढाउने निष्कर्ष निकालेको छ।