रौतहटको चन्द्रपुर नगरपालिका-१, जिरो माइलमा बागमती सिँचाइ आयोजनाले अतिक्रमित नहर क्षेत्रको नापजाँच सुरु गरेपछि ४०० घरधुरी विस्थापित हुने जोखिममा परेका छन्।
संघीय सरकारको परिपत्र र निर्देशनमा आयोजनाले अतिक्रमित क्षेत्रलाई पूर्ण स्वामित्वमा ल्याउने जनाएको छ।
आयोजनाका अनुसार, नापजाँचबाट नहरको जमिन यकिन भएपछि त्यहाँ निर्माण गरिएका भौतिक संरचनाहरू हटाइनेछन्। आयोजनाको नियमानुसार नहरको दुवैतर्फ ६०–६० मिटर क्षेत्र आयोजनाको क्षेत्राधिकारभित्र पर्दछ।
यो प्रक्रियाबाट रौतहट खण्डमा करिब ४०० घरधुरी प्रभावित हुने अनुमान छ। नहर खाली गर्ने सूचनापछि विगत ३० वर्षदेखि बसोबास गर्दै आएका स्थानीय चिन्तित छन्।
वर्षौंदेखि बसोबास गरी सानोतिनो व्यवसाय चलाएका परिवारहरू उठिबासको डरले त्रसित छन्।
प्रभावित बासिन्दाले उचित विकल्प र स्थायी व्यवस्थापन नगरी नहटाउन माग गरेका छन्। उनीहरूले जनप्रतिनिधिसँग भेटेर सुरक्षित बसोबासको सुनिश्चितता माग गरेका छन्।
वैकल्पिक व्यवस्थापन नभए जबरजस्ती हटाए आन्दोलनमा उत्रिने प्रभावित बासिन्दाले चेतावनी दिएका छन्।
