धरानका बराह र श्रेया बचत तथा ऋण सहकारी संस्था झण्डै १२ अर्ब रुपैयाँ हिनामिनापछि डुबेका छन्।
बराह सहकारीमा ११ अर्ब रुपैयाँ र श्रेया सहकारीमा १ अर्ब रुपैयाँभन्दा बढी रकम अपचलन भएको खुलेको छ।
हाल दुवै सहकारीका अध्यक्ष फरार छन्। श्रेया सहकारीका अध्यक्ष लोकबहादुर लिम्बु समस्यामा परेपछि विदेश पुगेका छन्। बराह ग्रुपका अध्यक्ष विश्वकुमार विश्वकर्मा (लामिछाने) पनि विदेश पुगेको आशंका गरिएको छ।
धरान उपमहानगरपालिकाले यी बन्द सहकारीहरूको फाइल हेर्दै आएको थियो। उपमहानगरपालिकाले बराह सहकारीलाई २०८२ भदौ २२ गते समस्याग्रस्त घोषणा गरेको थियो।
६ वर्षदेखि बन्द रहेको श्रेया बचत तथा ऋण सहकारी संस्थालाई धरानले २०८१ सालमा समस्याग्रस्त घोषणा गरेको थियो। स्थानीय स्तरबाट समस्या समाधान हुन नसकेपछि धरान उपमहानगरपालिकाले केन्द्रीय सरकार गुहारेको छ।
धरान उपमहानगरपालिकाले भूमि व्यवस्था, कृषि तथा सहकारी मन्त्रालयलाई पत्र लेखेको छ। उसले दुवै सहकारीलाई समस्याग्रस्त सूचीमा समावेश गर्न आग्रह गरेको छ। पीडितलाई न्याय र पीडकलाई कारवाही गर्न पनि माग गरेको छ। उपमहानगरपालिकाले स्थानीय प्रयास पर्याप्त नभएको र परिस्थिति आफ्नो नियन्त्रणभन्दा बाहिर पुगेको जनाएको छ।
