दोलखामा पछिल्लो दुई महिना (साउन र भदौ) मा प्राकृतिक विपद्मा परी ६४ जनाको मृत्यु भएको छ।
जिल्ला प्रशासन कार्यालय दोलखाबाट प्राप्त विवरणअनुसार बाढी, पहिरो र हिमपहिरोजस्ता घटनामा जिल्लाका नौवटै स्थानीय तहका नागरिकले ज्यान गुमाएका हुन्। यस अवधिमा धेरैजसोको मृत्यु गत भदौ १० गते रसुवाको भोटेकोशीमा आएको विनाशकारी बाढीका कारण भएको हो।
सबैभन्दा बढी गौरीशंकर गाउँपालिकाका ११ जनाको मृत्यु भएको छ। तीमध्ये आठ जनाको रसुवाको भोटेकोशीमा आएको बाढीमा परी ज्यान गएको थियो। गौरीशंकर गाउँपालिकाकै किलि पेम्बा शेर्पा र पदम तामाङको हिमपहिरोमा परी मृत्यु भएको थियो भने चस्मान तामाङ स्थानीय पहिरोमा बेपत्ता भएका थिए।
त्यस्तै, भीमेश्वर नगरपालिकाका १० जनाको पनि रसुवाको भोटेकोशी बाढीमा परी मृत्यु भएको छ। बाढीमा बेपत्ता भएको झन्डै दुई महिना बितिसक्दा पनि उनीहरूको अवस्थाबारे यकिन जानकारी प्राप्त हुन नसकेपछि परिवारले अन्तिम संस्कारसमेत गरिसकेका छन्।
भोटेकोशी बाढीमा परी कालिञ्चोक गाउँपालिकाका आठ, जिरी नगरपालिकाका आठ र बैतेश्वर गाउँपालिकाका सात जनाले ज्यान गुमाएका छन्। मेलुङ गाउँपालिकाका छ, शैलुङ गाउँपालिकाका पाँच तथा बिगु र तामाकोशी गाउँपालिकाका चार/चार जनाको पनि बाढीमा परी मृत्यु भएको विवरण जिल्ला प्रशासन कार्यालयले जनाएको छ।
गत भदौ १० गते बिहान रसुवाको भोटेकोशीमा आएको विनाशकारी बाढीमा दोलखाका ६१ जना एकैपटक बेपत्ता भएका थिए। लामो समयसम्म खोजी तथा उद्धारको प्रयास जारी रहे पनि बेपत्ता भएकामध्ये धेरैको अवस्था अझै अज्ञात रहेको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार, भोटेकोशी–त्रिशूली बाढी तथा मनसुनजन्य विपद्का कारण हालसम्म ५,२८५ जना बेपत्ता छन्। सरकारले बेपत्ता भएका नागरिकलाई निश्चित प्रक्रिया पूरा गरी ‘मृतक’ सरह मान्यता दिने गरी तीनवटा महत्त्वपूर्ण ऐन संशोधन गर्ने प्रक्रिया अघि बढाएको छ।
यसअघि: भोटेकोशी बाढी: ठूलो जनधनको क्षति, पुनर्निर्माणको चुनौती र अब के हुन्छ
