चीनतर्फका तीन प्रमुख उत्तरी व्यापारिक नाका अवरुद्ध हुँदा चाडपर्वको मुखमा बजारमा उपभोग्य वस्तुको अभाव भई महँगी बढ्ने भएको छ। भोटेकोशी नदीमा आएको बाढी र पहिरोले रसुवागढी, तातोपानी र कोरला नाकाबाट हुने आयात प्रभावित भएको हो।
गत भदौ १० मा भोटेकोशी नदीमा आएको बाढीले रसुवागढी नाका बन्द गरेको थियो। त्यसपछि पहिरोको जोखिम देखाउँदै चीनले सिन्धुपाल्चोकको तातोपानी नाकाबाट आयात–निर्यात रोक्यो। काठमाडौँबाट नजिकका यी दुवै नाका बन्द भएपछि व्यापारीले मुस्ताङको कोरला नाका प्रयोग गर्न थालेका थिए।
तर, असोज ९ देखि ११ सम्मको भारी वर्षाले बेनी–जोमसोम सडकखण्डमा पहिरो खसेपछि कोरला नाकाबाट पनि आयात–निर्यात बन्द भयो। यसका कारण करिब दुई सय कन्टेनर र सयौँ विद्युतीय गाडी मुस्ताङमै फसेका छन्।
एकता व्यापार संघ नेपालका अध्यक्ष माधव खरेलका अनुसार, उत्तरी नाकाबाट सामान आउन १५ दिनसम्म लाग्ने भएकाले अब भारतबाट सामान ल्याउनुपर्ने अवस्था आएको छ। यसले गर्दा जाडोका कपडासहित अन्य अत्यावश्यक सामग्रीको अभाव र मूल्यवृद्धि हुने देखिएको छ।
नेपाल राष्ट्र बैंकको पछिल्लो प्रतिवेदनअनुसार, वार्षिक विन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ५.९६ प्रतिशत रहेको छ। नाका बन्द हुँदा यातायात खर्च बढेकाले यसले थप महँगी बढाउने व्यवसायीहरूको भनाइ छ।
सिन्धुपाल्चोकका प्रमुख जिल्ला अधिकारी उमेशकुमार ढकालका अनुसार, तातोपानी नाका असोज १९ गतेदेखि खुल्ने सहमति भएको छ। यद्यपि, रसुवागढी र कोरला नाका पूर्ण रूपमा कहिले खुल्छ भन्ने स्पष्ट भइसकेको छैन।
