शिक्षा, विज्ञान तथा खेलकुद मन्त्रालयले आठ विश्वविद्यालयमा रिक्त उपकुलपति पदका लागि छनोट प्रक्रियाको अन्तिम चरणमा पुगेका उम्मेदवारहरूको अन्तर्वार्ता असार १३ देखि १५ गतेसम्म सञ्चालन गर्ने भएको छ। मन्त्रालयले मंगलबार सूचना जारी गर्दै मिति तय गरेको हो।
अन्तर्वार्ता त्रिभुवन विश्वविद्यालय, सुदूरपश्चिम विश्वविद्यालय, पूर्वाञ्चल विश्वविद्यालय, मध्यपश्चिम विश्वविद्यालय, पोखरा विश्वविद्यालय, राजर्षिजनक विश्वविद्यालय, कृषि तथा वन विज्ञान विश्वविद्यालय र लुम्बिनी बौद्ध विश्वविद्यालयका लागि हुन लागेको हो। सबै उम्मेदवारहरूको प्रस्तुतीकरण शिक्षा मन्त्रालयमा हुनेछ।
हाल देशभरका १५ विश्वविद्यालय उपकुलपति वा रजिष्ट्रारविहीन अवस्थामा निमित्तको भरमा सञ्चालित छन्। यसले शैक्षिक प्रशासन र दीर्घकालीन योजना कार्यान्वयनमा समस्या निम्त्याएको छ।
गत जेठ २२ गते मन्त्रालयले यी आठ विश्वविद्यालयका उपकुलपति पदका लागि आवेदन दिएका ७७ जना उम्मेदवारहरूको अल्पसूची सार्वजनिक गरेको थियो। सिफारिस समितिले अल्पसूचीमा परेका उम्मेदवारबारे सरोकारवाला निकाय र सर्वसाधारणबाट राय–सुझाव संकलन गरिसकेको छ।
अन्तर्वार्ता र प्रस्तुतीकरण सकिएपछि नयाँ उपकुलपति नियुक्ति प्रक्रियाले अन्तिम रूप पाउने अपेक्षा गरिएको छ।
