ताजा अपडेट: अख्तियारले महोत्तरीका सर्वेक्षक शिवकुमार साहविरुद्ध १ लाख घुसको आरोपमा आरोपपत्र दायर
अख्तियार दुरुपयोग अनुसन्धान आयोगले नापी कार्यालय बर्दिबास, महोत्तरीका सर्भेक्षक शिवकुमार साहविरुद्ध भ्रष्टाचार मुद्दा दायर गरेको छ।
आयोगले साहविरुद्ध २०८३ असोज २० गते बुधबार विशेष अदालत, काठमाडौंमा आरोपपत्र दायर गरेको हो। उनलाई जग्गाको नक्सा संशोधनका लागि सेवाग्राहीसँग १ लाख रुपैयाँ घुस लिँदै गर्दा पक्राउ गरिएको थियो।
सर्भेक्षक साहलाई नापी कार्यालय बर्दिबास अगाडिको एक खाजा घरबाट २०८३ भदौ ३० गते घुस रकमसहित नियन्त्रणमा लिइएको थियो। अख्तियारका प्रवक्ता सुरेश न्यौपानेका अनुसार अनुसन्धानबाट साहले घुस लिएको पुष्टि भएपछि मुद्दा चलाइएको हो।
अख्तियारले साहविरुद्ध १ लाख रुपैयाँ बिगो कायम गरी सोही बराबरको जरिवाना र प्रचलित कानुनबमोजिम सजायको मागदाबी गरेको छ। भ्रष्टाचार निवारण ऐन, २०५९ अनुसार भ्रष्टाचार मुद्दा दायर भएपछि राष्ट्रसेवक कर्मचारी मुद्दाको किनारा नलागेसम्म स्वतः निलम्बनमा रहने व्यवस्था छ।
यस मुद्दामा विशेष अदालत, काठमाडौंमा सुनुवाइ अघि बढ्नेछ।
