सङ्घीय संसद् सचिवालयले प्रतिनिधिसभा र राष्ट्रियसभाका सदस्यहरूको विद्युतीय हाजिरी प्रयोजनका लागि बायोमेट्रिक विवरण सङ्कलन सुरु गरेको छ। सचिवालयका प्रवक्ता एकराम गिरीका अनुसार, सङ्घीय संसद्का सबै सदस्यको बैठकमा उपस्थितिको विद्युतीय अभिलेख राख्न यो विवरण सङ्कलन भइरहेको छ। पहिलो दिन १०३ जना सांसदले विवरण बुझाएका छन्।
सचिवालयले यस प्रयोजनका लागि वैशाख २४, २५ र २८ गतेको मिति निर्धारण गरेको थियो।
यो कार्य केवल हाजिरीका लागि मात्र नभई, दीर्घकालीन सोचसहित अघि बढाइएको हो। यसबाट दुवै सभामा हुने मतदान, प्रस्तावको निर्णय, विधेयक र शून्य समयमाथिको छलफलमा भाग लिने सांसदको नाम तुरुन्तै यकिन गर्न सकिनेछ। यसले संसदीय कार्यसम्पादनमा पारदर्शिता र सहजता ल्याउने अपेक्षा गरिएको छ।
सङ्कलन गरिएको बायोमेट्रिक प्रणालीको प्रयोग यही वैशाख २८ गतेदेखि सुरु हुने संसद् अधिवेशनमा हुनेछ।
