राष्ट्रिय गौरवको आयोजना सुनकोशी-मरिण डाइभर्सनको ठेक्कामा गम्भीर लापरबाही गर्ने रमण कन्स्ट्रक्सन प्रालि र पटेल इन्जिनियरिङ लिमिटेडको संयुक्त भेन्चर (जेभी) तीन वर्षका लागि कालोसूचीमा परेको छ। सार्वजनिक खरिद अनुगमन कार्यालयले उक्त कम्पनीलाई कालोसूचीमा राख्ने निर्णय गरेको हो।
गत वर्ष कात्तिक तेस्रो साता आयोजनाले ठेकेदार कम्पनीलाई ‘किन ठेक्का नतोड्ने?’ भन्दै स्पष्टीकरण सोधेको थियो। कम्पनीको जवाफ चित्तबुझ्दो नभएपछि आयोजनाले सार्वजनिक खरिद अनुगमन कार्यालयमा कालोसूचीमा राख्नका लागि सिफारिस गरेको थियो।
उक्त कम्पनीले ठेक्का सम्झौताअनुसार काम नगरेको र तोकिएको समयमा काम सम्पन्न गर्न गम्भीर लापरबाही गरेको आरोप छ। यस निर्णयले राष्ट्रिय गौरवको आयोजनाको निर्माण कार्यमा थप ढिलाइ हुने देखिएको छ।
