सप्तरीस्थित भेटेरिनरी अस्पताल तथा पशु सेवा विज्ञ केन्द्रको भवन निर्माणमा भएको अनियमिततामा अख्तियार दुरुपयोग अनुसन्धान आयोगले तत्कालीन कार्यालय प्रमुखसहित पाँच जनाविरुद्ध भ्रष्टाचार मुद्दा दायर गरेको छ। उनीहरूले राज्यलाई १ करोड २६ लाखभन्दा बढीको नोक्सानी पुर्याएको आरोप छ।
विशेष अदालतमा दायर अभियोगपत्र अनुसार, राम निर्माण सेवाले २ करोड ८९ लाख ६४ हजार २४१ रुपैयाँमा ठेक्का कबोल गरेको थियो। तर, उक्त कम्पनीलाई ठेक्का नदिई ४ करोड १६ लाख ६० हजार ५१० रुपैयाँ कबोल गर्ने राधा कृष्ण निर्माण सेवालाई ठेक्का दिइएको थियो। यस प्रक्रियाले राज्यलाई १ करोड २६ लाख ९६ हजार २६८ रुपैयाँ ७१ पैसा अतिरिक्त व्ययभार पारेको अख्तियारको दाबी छ।
मुद्दा दर्ता भएका प्रतिवादीहरूमा तत्कालीन कार्यालय प्रमुख वरिष्ठ पशु विकास अधिकृत डा. प्रभात झा, इन्जिनियर अशोक कुमार सिंह, असिस्टेन्ट सब-इन्जिनियर प्रेम कुमार सिंह र राधा कृष्ण निर्माण सेवाका प्रबन्धक कौशल्या कुमारी रजक रहेका छन्।
आयोगले आरोपितहरूमाथि भ्रष्टाचार निवारण ऐन, २०५९ को दफा १७ अनुसार बिगो बराबर जरिवाना र कैद सजायको मागदाबी गरेको छ। गलत मूल्याङ्कन प्रतिवेदन तयार पारेको आरोपमा थप सजायको मागसमेत गरिएको छ।
