झापाको मेचीनगरमा जङ्गली हात्तीको आक्रमणबाट नागरिकको जीउधनको सुरक्षा गर्न विशेष ‘टास्क फोर्स’ परिचालन गरिने भएको छ। प्रधानमन्त्री कार्यालयको निर्देशनमा गठन प्रक्रिया अघि बढेको छ।
सांसद निशा डाँगीले प्रधानमन्त्री कार्यालयले प्रक्रिया अघि बढाउन निर्देशन दिएको बताइन्। अब प्रमुख जिल्ला अधिकारीले समन्वय गर्नेछन्। गत हप्ता मेचीनगर–४ मा ६२ वर्षीया पद्मा पौडेलको हात्ती आक्रमणमा मृत्यु भएपछि स्थानीयवासीले तत्काल समाधानको माग गरेका थिए।
सांसद डाँगी र राष्ट्रियसभा सदस्य रोशनी मेचेले संसद्मा हात्ती नियन्त्रण गरी नागरिक सुरक्षाका लागि ठोस कदम चाल्न माग गरेका थिए।
टास्क फोर्समा सशस्त्र प्रहरी, नेपाल प्रहरी र सशस्त्र वन रक्षक रहनेछन्। प्रमुख जिल्ला अधिकारीले यसको परिचालन गर्नेछन्। हात्तीको प्रवेशमार्ग मानिएको मेचीनगरको सीमावर्ती बाहुनडाँगी क्षेत्रमा फोर्स खटाइनेछ। भारतको आसाम र पश्चिम बङ्गालबाट जङ्गली हात्तीको बथान नेपाल प्रवेश गर्ने गर्दछ।
वन्यजन्तु आरक्ष क्षेत्र नभएकाले सुरक्षाकर्मी परिचालनमा जटिलता छ। सशस्त्र प्रहरी र नेपाल प्रहरी सङ्घीय सरकार मातहत छन्। सशस्त्र वन रक्षक प्रदेश सरकारको मातहतमा पर्छन्।
टास्क फोर्समा कति सुरक्षाकर्मी परिचालन हुने यकिन छैन। सांसद डाँगीले ५० जनाको माग गरिएको बताइन्। अनुभवी र तालिमप्राप्त सुरक्षाकर्मी आवश्यक पर्ने भएकाले सुरुमा कम्तीमा १० जनाको टोली परिचालन गर्न सुझाव आएको छ।
मेचीनगरमा ‘टास्क फोर्स’ परिचालनको खबरले स्थानीयवासी उत्साहित छन्। मेचीनगर–४ का वडाध्यक्ष अर्जुन कार्कीले सुरक्षाकर्मी परिचालनको निर्णय स्वागतयोग्य रहेको बताए। उनले प्रशिक्षण प्राप्त सुरक्षाकर्मी खटाउनुपर्नेमा जोड दिए।
तत्कालीन बाहुनडाँगी गाउँ विकास समितिका अध्यक्ष नीलकण्ठ तिवारीले भारतीय क्षेत्रबाट हात्तीको बथान भित्रिन नदिने ठोस कार्ययोजनासहित सरकार अघि बढ्नुपर्ने बताए।
