कोशी, बागमती, गण्डकी र लुम्बिनी प्रदेशका पहाडी भू-भागमा आज भारी वर्षाको सम्भावना छ। मौसम पूर्वानुमान महाशाखाका अनुसार मनसुनी वायुको प्रभावले देशैभर मनसुनको न्यून चापीय रेखा सरदर स्थानको आसपासमा रहेको छ।
हिमाली भू-भागका केही स्थानमा मेघगर्जन, चट्याङ्गसहित वर्षा र हिमपातको सम्भावना छ। बागमती, गण्डकी, लुम्बिनी र सुदूरपश्चिम प्रदेशका तराई भू-भागका केही स्थानमा तथा मधेश प्रदेश र कोशी प्रदेशका तराई भू-भागका थोरै स्थानमा मेघगर्जन, चट्याङ्गसहित वर्षाको सम्भावना छ।
आज राति कोशी, बागमती र गण्डकी प्रदेशको पहाडी भू-भागका केही स्थानमा वर्षाको सम्भावना छ। लुम्बिनी, कर्णाली र सुदूरपश्चिम प्रदेशका पहाडी भू-भागका थोरै स्थानमा पनि मेघगर्जन, चट्याङ्गसहित वर्षाको सम्भावना छ। कोशी, बागमती र गण्डकी प्रदेशका तराई भू-भागका केही स्थानमा वर्षा हुनेछ। मधेश प्रदेश तथा लुम्बिनी र सुदूरपश्चिम प्रदेशको तराई भू-भागका थोरै स्थानमा पनि मेघगर्जन, चट्याङ्गसहित वर्षाको सम्भावना छ।
महाशाखाले वर्षापछि आउन सक्ने गेग्रान बहाव, बाढी, पहिरो तथा भू-क्षय जस्ता प्रकोपबाट बच्न सतर्कता अपनाउन अनुरोध गरेको छ। यसबाट दैनिक जनजीवन, कृषि, स्वास्थ्य, पर्यटन, पर्वतारोहण, सडक तथा हवाई यातायातमा असर पर्न सक्नेछ।
