बागमती प्रदेशका मुख्यमन्त्री किरण थापामगरले आज (सोमबार) प्रदेश सभामा विश्वासको मत लिँदैछन्। प्रदेशसभा सचिवालयका अनुसार मुख्यमन्त्री थापा मगरले संविधानको धारा १६८ को उपधारा (४) र नियमावली, २०७४ को नियम १४३ बमोजिम विश्वासको मतको प्रस्ताव सभामा प्रस्तुत गर्नेछन्।
मुख्यमन्त्रीमा नियुक्त भएको चौथो दिनमै विश्वासको मत लिन लागेका थापा मगरका लागि यो प्रक्रिया चुनौतीपूर्ण बनेको छ। बिहीबार प्रदेश प्रमुख दीपकप्रसाद देवकोटाले उनलाई मुख्यमन्त्रीमा नियुक्त गरेका थिए।
सरकारलाई समर्थन गरेको राष्ट्रिय प्रजातन्त्र पार्टी (राप्रपा) ले मुख्यमन्त्रीलाई विश्वासको मत नदिन आफ्ना प्रदेशसभा सदस्यहरूलाई ह्विप जारी गरेको छ। राप्रपाकी प्रमुख सचेतक कुमारी तामाङले जारी गरेको ह्विपमा विपक्षमा मतदान गर्न, तटस्थ रहन वा बैठकमा अनुपस्थित हुन निर्देशन दिइएको छ।
यो ह्विपले बागमती प्रदेश सभामा सरकारको पक्षमा आवश्यक बहुमत जुटाउने प्रयासलाई कठिन बनाएको छ। १०४ सदस्यीय प्रदेश सभामा सरकार टिकाउन ५३ सांसदको समर्थन आवश्यक पर्छ। मुख्यमन्त्री थापा मगरको पक्षमा एमालेका २४ सांसदको मत मात्र सुनिश्चित छ।
यद्यपि, राप्रपाले विपक्षमा मतदान गर्न निर्देशन दिए पनि पार्टीका तीन जना सांसद मन्त्रीका रूपमा सरकारमा सहभागी छन्। पार्टीले संसदीय दलका नेता उद्धव थापालाई साधारण सदस्यसमेत नरहने गरी कारबाही गरेको सन्दर्भमा राप्रपाका केही सांसदले ‘फ्लोर क्रस’ गरी मुख्यमन्त्रीको पक्षमा मतदान गर्ने सम्भावना छ। यसले आजको मतदानलाई राजनीतिक रूपमा महत्वपूर्ण बनाएको छ।
