कृषि, वन तथा पर्यावरणमन्त्री गीता चौधरीले सङ्क्रामक पशु रोग नियन्त्रण गर्न ‘सङ्क्रामक पशु रोग नियन्त्रण सम्बन्धमा व्यवस्था गर्न बनेको विधेयक’ को मस्यौदा तयार भएको बताइन्। यो विधेयकले पशुजन्य रोगका कारण अर्थतन्त्रमा हुने अर्बौंको क्षति रोक्ने लक्ष्य राखेको छ।
राष्ट्रियसभाको विधायन व्यवस्थापन समितिमा विधेयकबारे सैद्धान्तिक छलफल गर्दै मन्त्री चौधरीले ‘बर्ड फ्लु’ र ‘लम्पी स्किन’ जस्ता रोगले पशु निर्यातमा पारेको नकारात्मक प्रभाव समाधान गर्न यो कानुन आवश्यक रहेको बताइन्। चीनमा भैँसीको मासु निर्यात गर्ने सम्झौता सङ्क्रामक रोगकै कारण रोकिएको थियो। यो कानुनले पशु स्वास्थ्य मात्र नभई मानव स्वास्थ्यमा पनि सकारात्मक प्रभाव पार्ने विश्वास उनले व्यक्त गरिन्।
समितिका सभापति कृष्णबहादुर रोकायाले सांसदहरूले उठाएका सैद्धान्तिक सुझाव मन्त्रालयले अध्ययन गरी अघि बढाउनुपर्ने बताए। विषयविज्ञ र सरोकारवाला निकायका प्रतिनिधिलाई बोलाएर भदौ १० गते थप छलफल गरिने उनले जानकारी दिए।
राष्ट्रियसभा सदस्य सुरेशकुमार आलेमगरले विधेयकमा असङ्क्रामक रोगको विषय समेट्नुपर्ने र कार्यान्वयनका लागि बजेटको व्यवस्था गरिनुपर्ने सुझाव दिए।
