रसुवामा बाढीले प्रभावित ९७ जनाको उद्धार गरिएको छ। उद्धार कार्यमा नेपाली सेनाका ७ र निजी क्षेत्रका ८ गरी १५ हेलिकप्टर परिचालन गरिएको छ।Nmkhabarलाई स्रोतले पुष्टि गर्यो।
घाइतेको उपचारका लागि वीरेन्द्र अस्पतालको मेडिकल टोली त्रिशूलीस्थित नम्बर १ सैन्य तालिम केन्द्रमा खटिएको छ। विपद् व्यवस्थापनका लागि फिल्ड अस्पताल, औषधि र उपकरण त्रिशूली पठाइएको छ।
पूर्वराजा ज्ञानेन्द्र शाहले तिब्बतमा हिमताल फुटेर आएको बाढीबाट भएको जनधनको क्षतिप्रति दुःख व्यक्त गरेका छन्। उनले प्रभावितको उद्धार, खोजी, राहत र उपचारलाई प्रभावकारी बनाउन आग्रह गरेका छन्।
शाहले भोटेकोशी र त्रिशूली नदीको बाढीले रसुवा, नुवाकोट, धादिङ, गोरखा, चितवन र नवलपरासीका नदी आसपासका बस्ती तथा बजार प्रभावित पारेको उल्लेख गरे। बाढीले सडक, पुल, जलविद्युत् आयोजना र कृषि क्षेत्रमा क्षति पुर्याएको छ।
उनले सुरक्षा निकाय, सरकारी कर्मचारी, स्थानीय तह, सामाजिक संस्था र आम नागरिकलाई सहयोगमा जुट्न अपिल गरे। सीमा जोडिएका नेपाल, भारत र चीनबीच संयुक्त संयन्त्रमार्फत विपद् व्यवस्थापन गरिनुपर्ने उनको भनाइ छ।
